ޝަރީޢަތުގެ މަޖިލިސްތައް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދިޔުމަށް ޢަމަލުކުރާނެ އުޞޫލެއް އެކުލަވާލައިފިއެވެ.
ކްރިމިނަލް ކޯޓުން ބުނީ ޤާނޫނުގެ ދަށުން ހެދިފައިވާ ޝަރީޢަތް ކުރުމާބެހޭ ޖިނާއީ އިޖުރާޢަތުގެ ޤަވާޢިދާއި އެއްގޮތައް، ޖިނާޢީ މައްސަލަތަކުގެ ޝަރީޢަތުގެ މަޖިލިސްތައް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދިޔުމުގެ ކަންކަން ކޯޓުން އިންތިޒާމުކޮށް ހަމަޖެއްސުމުގައި ޢަމަލުކުރާނެ ގޮތުގެ އުޞޫލެއް ކްރިމިނަލް ކޯޓުން އެކުލަވާލާފައިވާ ކަމަށެވެ.
އަދި މިއުޞޫލު ފާސްކޮށްފައިވަނީ 28 މާރޗް 2020 ވަނަ ދުވަހުގެ 22:00 ގައި ޤާޒީންގެ ވައިބަރ ގްރޫޕުގައި ބޭއްވުނު ޤާޒީންގެ ޢާންމު މަޖިލީހުން ކަމަށް ކްރިމިނަލް ކޯޓުން ބުންޏެވެ.
މިއުޞޫލުގައި، ވީޑިއޯ ކޮންފަރެންސް މެދުވެރިކޮށް ކުރިއަށް ގެންދިޔުމަށް ކޯޓުން ނިންމާ ޙާލަތުގައި، ދައުލަތުގެ ވަކީލުންނާއި ދިފާޢީ ވަކީލުންނާއި އިންވެސްޓިގޭޝަން އޮފިސަރުން ވީޑިއޯ ކޮންފަރެންސް މެދުވެރިކޮށް ޝަރީޢަތުގެ މަޖިލީހުގައި ބައިވެރި ކުރުމުގައި ކޯޓުން ޢަމަލުކުރާނެ ގޮތްވެސް ބަޔާންކޮށްފައިވެއެވެ.
