އައްޑޫސިޓީ ހިތަދޫގައި ދެ ނަރުހުންނާއި އެއް ޑޮކްޓަރު ގޭގައި އެކަހެރިކޮށްފިއެވެ.
އާދިއްތަ ދުވަހުގެ ހަވީރު ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ އިންޑިއާގެ ކޮޗިން އިން ރާއްޖެ އައި ދިވެއްސެއް ކޮވިޑް-19 މި ބަލީގެ އަލާމާތްތައް ހުރެގެން، އައްޑޫ އެކުއެޓޯރިއަލް ހޮސްޕިޓަލަށް ޑޮކްޓަރަށް ދައްކަން ގޮސްފައިވާ ކަމަށެވެ.
އަދި އެ ހޮސްޕިޓަލްގެ އެމެޖެންސީ ރޫމަށް ދިޔައިރު އޭނައަށް ފަރުވާ ދިނުމުގައި އެންމެ ފުރަތަމަ ހަރަކާތްތެރިވެފައިވާ ކަމަށާއި އޭނައަށް ފަރުވާ ދިނުމުގައި ހަރަކާތްތެރިވިއިރު އެ ދެ ނަރުހުނާއި ޑޮކްޓަރުން ތިބީ ޕްރޮޓެކްޓިވް އިކުއިޕްމަންޓްގައި ނޫން ކަމަށް ވެސް މަބްރޫކް ވިދާޅުވިއެވެ. އެހެންކަމުން އެ ދިވެހި މީހާގެ ސާމްޕަލްގެ ނަތީޖާ ލިބެންދެން އެ ހުރިހާ އެންމެ ގޭގައި އެކަހެރި ކުރެވިފައިވާ ކަމަށް މަބްރޫކް ވިދާޅުވިއެވެ.
ރާއްޖެއިން މިހާތަނަށް ކޮވިޑް-19 އަށް 17 މީހަކު ޕޮޒިޓިވްވެފައިވާއިރު 11 މީހަކަށް ވަނީ މި ވައިރަހުން ރަނގަޅުވެފައެވެ. އަދި 4 މީހަކަށް ރާއްޖޭގައި ފަރުވާދެމުންދެއެވެ. އިޓަލީ ދެ މީހަކު ރާއްޖެއިން ފުރައިގެން ގޮސްފައިވެއެވެ.
ރާއްޖެއިން ކޮވިޑް-19 ގެ ކޭސްތައް މިހާތަނަށް ފެނިފައިވަނީ:
- ކުރެއްދޫ ރިސޯޓް – 5 ކޭސް
- ބަތަލާ ރިސޯޓް – 2 ކޭސް
- ކުރަމަތި ރިސޯޓް – 2 ކޭސް
- އަނަންތަރާ ރިސޯޓް – 2 ކޭސް
- އައިލެންޑް ސަފާރީ – 4 ކޭސް
- އިނގިރޭސިވިލާތް ރާއްޖެއަށް އައި ދެމީހުން – 2 ކޭސް
މިހާތަނަށް 908 ސާމްޕަލް ނެގިފައިވާއިރު 891 ސާޕްޕަލްގެ ނަތީޖާ ނެގެޓިވެފައިވެއެވެ. އަދި ނަތީޖާ ނުލިބި އެއްވެސް ސާމްޕަލެއް ނުވެއެވެ. ދެ ސާމްޕަލެއް ނެގުމަށްޓަކައި ހުރަވަޅި މޯލްޑިވްސް ރިސޯޓު މޮނީޓަރިންގއަށް ލެވިފައިވާއިރު މާހާ ސަފާރީ ބޯޓުގެ މޮނީޓަރިންގ ވަނީ އުވާލާފައެވެ.
އައިސޮލޭޝަން ފެސިލިޓީގައި ތިބި މީހުންނަށް ބަލާލާއިރު ވެލިދޫގައި 20 މީހުންނާއި ދަރުމަވަންތަ ހޮސްޕިޓަލުގައި 3 މީހުން އެބަތިއްބެވެ. އެންމެ ގިނައިން މީހުން ކަރަންޓީންގައި ބެހެއްޓިފައިވަނީ ރޯޔަލް އައިލެންޑް ރިސޯޓުގައެވެ. އެ ރިސޯޓުގައި ޖުމްލަ 191 މީހުން އެބަތިއްބެވެ. އެއަށްފަހު އެންމެ ގިނައިން މީހުން ތިބީ ހޮލިޑޭ އައިލެންޑް ކަރަންޓީން ފެސިލިޓީ އަދި މަޑިވަރު ކަރަންޓީން ފެސިލިޓީގައެވެ.
