ޔުނައިޓެޑް އަރަބި އެމިރޭޓްސް ގައި ކޮވިޑް-19 އަށް ޕޮޒިޓިވްވެފައިވަނީ ދިވެއްސެއް ނޫންކަމަށް ސަރުކާރުން ކަށަވަރުކޮށްދީފިއެވެ.

ހޮނިހިރު ދުވަހު ރޭ ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ އޮޕަރޭޝަން ސެންޓަރުގައި ނޫސްވެރިންނަށް މައުލޫމާތު ދެއްވަމުން އެ ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ، ޔޫއޭއީގެ ސަރުކާރުން ދިވެއްސެއް ޕޮޒިޓިވްވިކަމަށް ކޮށްފައި އިއުލާނެއް ފެނިފައިވާނެކަމަށާއި މިހާރު ޕޮޒިޓިވްވެފައިވަނީ ދިވެއްސެއްނޫންކަމަށް ދިވެހި ސަރުކާރަށް ޔަގީންވެފައިވާކަމަށެވެ.

ޔޫއޭއިން ދިވެއްސަކު ކޮވިޑް-19 އަށް ޕޮޒިޓިވްވެފައިވާކަން އެ ގައުމުގެ ހެލްތް މިނިސްޓްރީން ވަނީ މީގެ ކުރިން ރިޕޯޓް ކޮށްފައެވެ.

ޔޫއޭއީން ކޮވިޑް-19 އަށް ޕޮޒިޓިވްވި މީހުންގެ ތެރޭގައި ދިވެއްސަކު ހިމެނޭ ކަމަށް ރިޕޯޓް ކޮށްފައިވަނީ މި މަހުގެ 24 ވަނަ ދުވަހުއެވެ. އެމީހާއެކު މި ސަރަހައްދުގެ ގައުމުތަކުގެ އިތުރު ބަޔަކު ބައްޔަށް ޕޮޒިޓިވްވި ކަމަށް ވަނީ ރިޕޯޓްކޮށްފައެވެ.

ހޮނިހިރު ދުވަހާ ހަމަޔަށް ޔޫއޭއީގައި ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 405 އަށް ވަނީ އަރާފައެވެ. އެއީ ހޮނިހިރު ދުވަހު އަލަށް ރިޕޯޓްކުރެވުނު 72 ކޭސްއާ އެކުއެވެ. އޭގެ ތެރެއިން ގިނަ މީހުންނަކީ އޭޝިއާގެ ގައުމުތަކަށް ނިސްބަތްވާ މީހުންނެވެ. މިހާތަނަށް ބަލިން 55 މީހަކު ރަނގަޅުވެފައިވާ ކަމަށް ވަނީ ރިޕޯޓްކޮށްފައެވެ.