ކޮވިޑް-19އަކީ އާ ބައްޔެއް ކަމަށްވާތީ، ލިބޭ މައުލޫމާތުތަކާއި އެވިޑެންސްތައް ލިބޭ ވަރަކުން ބަހައްޓާ މިންގަނޑުތަކާއި އަމަލުކުރާ އުސޫލުތަކަށް ބަދަލު އަންނާނެ ކަމަށް ޑރ. މުއާޒު މޫސާ ވިދާޅުވެއްޖެއެވެ.

ހޮނިހިރު ދުވަހު ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ޑރ.މުއާޒު ވިދާޅުވީ ކަރަންޓީނުގައި ތިބޭ ބައެއް މީހުންގެ ސާންޕަލް ނަގާ ޓެސްޓުކުރުމުގެ ކަންތައްތައް މީގެ ކުރިން ނުކުރާ ކަމަށެވެ. ނަމަވެސް މިހާރު ލިބެމުންދާ އިތުރު އެވިޑެންސްއަށް ބަލުމަށްފަހު، ޓެސްޓު ކުރުމުގެ ކަންކަން ކުރިއަށް ގެންދިއުމަށް މަޝްވަރާކުރެވެމުންދާ ކަމަށާއި، ކުރިއަށް އޮތްތާގައި އެގޮތަށް އަމަލުކުރާނެ ކަމަށް ޑރ.މުއާޒު ވިދާޅުވިއެވެ.

ޑރ.މުއާޒު ވިދާޅުވީ އައިލެންޑް ސަފާރީ ވަންއިން ހަތަރު މީހަކު ޕޮޒިޓިވްފައިވާތީ، އެސަފާރީގައި ތިބި އެންމެން ވެސް މޮނިޓަރ ކުރަމުންދަނީ ހައިރިސްކް ކޮންޓެކްޓުގައި ތިބޭ ބައެއްގެ ގޮތުގައި ކަމަށެވެ.

ރާއްޖެ ފިޔަވައި އެހެން ގައުމަކުން ސަފަރީއަކުން ވައިރަސްއަށް ޕޮޒިޓިވްވެފައިވާ ކޭސްއެއް ނެތްކަން ފާހަގަކުރައްވައި ޑރ.މުއާޒު ވިދާޅުވީ ހާލަތަށް ރިއާޔަތްކޮށް މަސައްކަތްތައް ކުރިއަށް ގެންދާނެ ކަމަށެވެ.

ޑރ.މުއާޒު ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން މިވައިރަސްއަށް އަމަލުކުރަމުންދާ ގޮތް ބަލަމުންދާ ކަމަށާއި، ރާއްޖެއިން ވެސް ފްލޯ ކުރަމުންދަނީ އެގޮތަށް ކަމަށެވެ. އަދި ކޮވިޑް-19ގެ މައުލޫމާތުތަކާއި ދުނިޔޭގެ އެކިކަންކޮޅުތަކުގައި މިވައިރަސް ފެތުރޭ މިންވަރަށް އަދި ލިބޭ އެވިޑެންސްތަކަށް ބެލުމަށްފަހު، ޑަބްލިޔުއެޗްއޯއިން ވެސް އަމަލުކުރަމުންދާ ގޮތް ބަދަލުވާކަން ޑރ. މުއާޒު ފާހަގަކުރެއްވިއެވެ.

މީގެ އިތުރުން ޑރ.މުއާޒު ވަނީ އާންމު ރައްޔިތުން މިދުވަސްވަރު ކޮންމެހެން ބޭރަށް ނުކުންނަން ޖެހިގެން މެނުވީ ބޭރަށް ނުނިކުތުމަށް އިލްތިމާސްކުރައްވާފައެވެ.

ޑރ.މުއާޒު ވިދާޅުވީ ބޭރުގެ ގައުމުތަކުގައި މިބަލި ފެތުރުނު ގޮތަށް ބަލާއިރު، އާންމުން އެއްވެ ނޫޅުމާއި، ގޭގައި މަޑުކުރުމަކީ މިބަލިން ރައްކާތެރިވުމަށް އެޅޭނެ އެންމެ މުހިންމު ފިޔަވަޅު ކަމަށެވެ. އަދި ކޮންމެ މީހަކު ވެސް މިމަސައްކަތުގައި ފަރުދީ ޒިންމާ ނެގުމަށް ޑޮކްޓަރު ގޮވާލެއްވިއެވެ.