"މާހާ ސަފާރީ" ނަމަކަށް ކިޔާ ބޯޓެއް މޮނީޓަރިންގެ ހާލަތަށް ގެނެސްފައިވާކަމަށް ކޮވިޑް-19 އާއި ގުޅިގެން ސަރުކާރުން އެކުލަވާލާފައިވާ ޓާސްކްފޯސްގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ "މާހާ ސަފާރީ" ނަމަކަށް ކިޔާ ބޯޓެއް މޮނީޓަރިންގެ ހާލަތަށް ގެނެސްފައިވަނީ ވައިރަހަށް ޝައްކުކުރެވޭ މީހެއް ހުރުމުންކަމަށެވެ. އަދި އެމީހާގެ ސާމްޕަލް ނެގި ޓެސްޓު ކުރެވެމުންދާކަމަށެވެ.
ހުޅުމާލެ ކައިރީގައި އޮތް މި ބޯޓުގައި މިވަގުތު ތިބީ ތިން ބިދޭސީންނާއި ދެ ދިވެހިން ކަމަށް ވިދާޅުވިއެވެ.
މާހާ ސަފާރީ ބޯޓުގެ އިތުރުން މިވަގުތު މޮނީޓަރިންގެ ހާލަތުގައި އޮތީ ރީތީ ބީޗް ރިސޯޓާއި، އައިލެންޑް ސަފާރީ އާއި އައްޑޫ ސިޓީގައި ހުންނަ އީކުއޭޓަރ ވިލެޖްއެވެ.
ރާއްޖެއިން ކޮވިޑް-19 އަށް 13 މީހަކުވަނީ ޕޮޒިޓިވްވެފަ އެވެ. އެ ހުރިހާ އެންމެންނަކީވެސް ބިދޭސީންނެވެ. އެމީހުންގެ ތެރެއިން ފަސް މީހަކު ވަނީ ބަލިން ރަނގަޅުވެފައެވެ.
