ކޮވިޑް-19 ހުއްޓުވުމަށް އަޅާ ފިޔާވަޅެެއްގެ ގޮތުން އަންގާރަ ދުވަހުގެރޭ 12 އިންފެށިގެން 21 ދުވަހުގެ މުއްދަތަކަށް އިންޑިއާ ލޮކްޑައުންކުރަން އެ ގައުމުގެ ސަރުކާރުން ނިންމައިފިއެވެ.
އެކަން ހާމަކުރެއްވި އިންޑިއާގެ ރައްޔިތުންނަށް މުހާތަބު ކުރައްވާ ވާހަކަ ދައްކަވަމުން އެ ގައުމުގެ ބޮޑު ވަޒީރު ނަރެންދްރަ މޯދީއެވެ. މޯދީ ވިދާޅުވީ، ލޮކްޑައުންގައި އަމަލު ކުރަމުންދަނީ ކާފިޔުގައި އަމަލުކުރާ ގޮތަށް ކަމަށެވެ.
އެމަނިކުފާނު ވިދާޅުވީ، ލޮކްޑައުންގެ ސަބަބުން ގައުމުގެ އިގްތިސާދަށް އޭގެ އަސަރުކުރާނެ ކަމަށާއި، އެހެން ނަމަވެސް އިންސާނުން ސަލާމަތްކުރުން މުހިއްމު ކަމަށެވެ.
މޯދީ ވިދާޅުވީ، ސިއްހީ މާހިރުން ބުނާގޮތުންނަމަ އިންފެކްޝަންގެ ސައިކަލް ހުއްޓުވުމަށް މަދުވެގެން 21 ދުވަސް ބޭނުންވެއެވެ. އަދި ކުރިޔަށް އޮތް 21 ދުވަސް ތެރޭގައި ޕެންޑެމިކް މެނޭޖް ނުކުރެވިއްޖެނަމަ މީގެ 21 އަހަރު ކުރިޔަށް އައިލާތައް ދާނެ ކަމަށެވެ. އިންޑީއާގައި ކޮވިޑް-19 ޖެހުނު މީހުން ވަނީ 500 އަށްވުރެ މައްޗަށް އަރާފައެވެ.
