ކޮވިޑް-19 ހަލުވިކަމާއެކު ދުނިޔޭގެ ހުރިހާ ބައްރަކަށް ދަނީ ފެތުރެމުންނެވެ. ކޮންމެ ދުވަހަކު ކޮންމެ ސިކުންތަކު މިބަލީގެ ޝިކާރައަކަށްވާ އެތައް ބަޔަކު ދުނިޔެއާ އަލްވަދާއު ކިޔަވަމުންދާއިރު، މިވައިރަސްގެ ބިރުވެރިކަމުން ރައްކާތެރިވުމަށް އެކި ގައުމުތަކުން ދަނީ ތަފާތު އެކިފިޔަވަޅުތައް އަޅަމުންނެވެ.

އެގޮތުން ދުނިޔޭގެ އެކި ގައުމުތައް މިވަނީ ލޮކްޑައުންކޮށްފައެވެ. އަދި ބައެއް ގައުމުތައް ކުރިއަށް އޮތްތަނުގައި ލޮކްޑައުން ކުރާނެކަން ވެސް އިއުލާންކޮށްފައިވެއެވެ. މިގޮތަށް ލޮކްޑައުން ކުރުމުން އާންމުން އެއްވެއުޅުމާއި، ކެފޭތަކާއި، ފިހާރަތަކާއި، އަދި ބޭރުގައި އުޅުން އާންމުފަރުދުންނައް މަނާވެއެވެ. އަދި މިނޫން ގޮތްގޮތަށް އަމަލުކުރާ ފަރާތްތަކާ މެދު ބޮޑެތި އަދަދުތަކުން ޖޫރިމަނާ ކުރުމާއެކު ހަރުކަށި އަދަބުތައްދެއެވެ.

މިއީ މުޅި ގައުމުގެ ސަލާމަތާއި ރައްކާތެރިކަމަށްޓަކައި އެޅޭ އެންމެ ވަރުގަދަ މުހިންމު އެއް ފިޔަވަޅެވެ. ދުނިޔޭގެ މިހާރުގެ ހާލަތަށްބަލާއިރު، އިޓަލީއަކީ މިހާރު މިވައިރަސް އެންމެ ބާރަށް ފެތުރެމުންދާ ގައުމެވެ. އަދި އާބާދީގެ ކޮންމެ އެއް މިލިއަން މީހުންގެ ތެރެއިން 679 މީހުންނަށް ވައިރަސް ވަނީ ޖެހިފައެވެ.

މިއީ މުޅި ދުނިޔެއަށް ބަލާއިރު ރެކޯޑް އަދަދެކެވެ. މިހާރު އިޓަލީމިވަނީ ' ލޮކްޑައުން ' ކޮށްފައެވެ. މިނިވަން ކަންމަތީ ދިރިއުޅެމުން ދިޔަ އިޓަލީގެ ރައްޔިތުން މިއަދު މިވަނީ ގޭގައި ތިބުމަށް މަޖުބޫރުވެފައެވެ. ކާރުބާރުބޮޑު މިގައުމުގެ މަގުތައް ފަޅުވެފައިވާއިރު، މިއީ ބަލާލަން ހިތްދަތި މަންޒަރުތަކެކެވެ.

އިޓަލީ އަމާން މަންޒިލަކަށް ގެންދިއުމަށް ސަރުކާރުގެ އިތުރުން އެގައުމުގެ ރައްޔިތުން ބުރަ މަސައްކަތްތައް ކުރެއެވެ. އެގޮތުން މާޔޫސްވެ، މުޅި ގައުމު އަނދިރިވެފައިވާ މިދަނޑިވަޅުގައި އިޓަލީގެ ފަޅުކަންފިލުވަމުން އެދަނީ ތަފާތު ކަންތައްތަކެއް ކުރަމުންނެވެ.

އެގޮތުން އެގައުމުގެ ރައްޔިތުން ދަނީ ގޭގެ ބަދިގޭގައި ގެންގުޅޭ ސާމާނު ބޭނުން ކޮށްގެން ލަވަތައް ކިޔަމުންނެވެ. ރެޔާއިދުވާލު ކުޑަދޮރުތަކާއި، ބެލްކަނިތަކުން އިވެމުންދަނީ މިއަޑެވެ. މި ލަވަތަކުން އެއްބަޔަކު އަނެއްބަޔަކަށް ހިތްވަރުދީ ފަޅުވެފައިވާ މަގުތަކަށް ދިރުންދެމުންނެވެ. އެމީހަކަށް ވީވަރަކުން އަނެކާގެ ހިތަށް އުފާވެރިކަން ގެނެސް ދެމުންނެވެ. މިކަން ކުރަމުން ދަނީ ކުދިބޮޑު އެންމެން އެކުގައެވެ.

ދިމާވެފައިވާ ބިރުވެރިކަމުގަ ވެސް ޖެހިގެންހުރި ގޭގެ ބެލްކަނިން ނިކުމެހުރި ތުއްތުކުއްޖާގެ މޫނުމަތިން އުފާވެރިކަން ގެނެސްދިނުމުގެ ނިޔަތުގައެވެ. މާޔޫސް ވެފަތިބި އެތަކެއް ރައްޔިތުންތަކެއް އެދަނީ ހިނިތުން ވަމުންނެވެ. އަދި ވައިރަސް ޖެހިފައިވާ މީހުންނަށް ފަރުވާދޭ ޑޮކްޓަރުންނާއި ނަރުހުންނަށް ޝުކުރުއަދާކޮށް ލަވަތައް ހަދާ ކިޔަމުންނެވެ. ގައުމެއްގެ އެއްބައިވަންތަކަން ދައްކުވައިދެމުންނެވެ.

އިޓަލީން މިދައްކަމުންދާ ނަމޫނާ މިއަދު ކޮވިޑް-19 ޝިކާރައަށް ވަމުންދާ އެތަކެއް ގައުމުތަކުން މިދަނީ މިސާލު ނަގަމުންނެވެ.