ކުރީގެ ރައީސް އަދި މަނީލޯންޑްރިންގް މައްސަލައިގައި ގައިދުކުރެވިފައިވާ އަބްދުﷲ ޔަމީންގެ ވެރިކަމަކީ ހުރިހާ ގޮތަކުންވެސް ރައްޔިތުންގެ ތެރޭގައި ބިރުވެރިކަން އުފެއްދި ވެރިކަމެކެވެ. ހައްގުބަސް ބުނެ ރައްޔިތުންނަށް ތެދު މައުލޫމާތު ހާމަކޮށްދޭ މީހާއަށް ޖެހޭ ހާލު މާޒީގެ ސަފުހާތަކަށް ކުޑަކޮށް ނަޒަރު ހިންގާލިކަމުގައިވިޔަސް ވަރަށް ރަނގަޅަށް ސާބިތުވެގެންދާނެއެވެ. ދީނާއި ގައުމުގެ ދިފާއުގައި ޓެގް އެޅުވިގެން ތިބެ ފަރުދާގެ އަނެއް ފަރާތުން ކުރީ ހުސްވައްކަމެވެ. ބިތުފަންގި ނެގޭހެން ހީވިޔަސް އެމީހަކަށް އަދަބެއްގެ ގޮތުގައި ދައްކަނީ ކުޑަ ގޮޅިއެވެ.

ވަޒީފާގެ ބިރުވެރިކަން އިންތިހާއަށް އޮތް އިރު ގައުމުގެ މިނިވަން މުއައްސަސާތަކުގައި ތިއްބެވި ފަރާތްތަކުގެ ބާރު ހަނިކޮށް "ޔާނު" ބޭނުވާ ގޮތަށް ނިންމީ ނުފޫޒާއި ބިރުވެރިކަމުގެ ތެރެއަށް ވައްޓާލައިގެން މަޖުބޫރުކޮށްގެނެވެ. ހަގީގަތަށް މީހަކު ވާހަކަ ދައްކާކަމުގައި ވަނަމަ އެމީހަކަށް ކުޑަ ގޮޅިނޫން ތަނެއް ނުދައްކައެވެ. މިކަމުގައި ގައުމުގައި ވެރިކަން ކޮށްފައިހުރި ލީޑަރެއް، ނޫސްވެރިއެއް ނުވަތަ ރައްޔިތުމީހާވެސް އިސްތިސްނާވުމެއްނެތެވެ.

ވެރިކަމުގައި އާރާއި ބާރު ދަމަހައްޓަން ހަގީގަތަށް ބުނާކަމުގައި ވާނަމަ ނުކުރާކަމެއް ނެތެވެ. ގެއްލުވާލަން ބޭނުންވާ މީހަކު ގެއްލުވާލަނީއެވެ. ނުރުހޭ ކަމެއް ކުރާ ފަރާތްތައް ޖޫރީމަނާ ކުރީއެވެ. ރައްޔިތުންގެ ތާއީދާއި ނުލައި ވެރިކަން ކުރީ ވަރަށްވެސް ހުދުމުހުތާރުކޮށް ބާރުގެ ބޭނުންކޮށްގެނެވެ. ގައުމުގެ ތިން ބާރު އެއްކޮށް މުށުތެރެއަށް ލައި ވެރިކަމުގައި ދެމިހުރީ ކުއްލި ނުރައްކަލުގެ ހާލަތު އިއުލާންކޮށްގެނެވެ. ކޮންމެއަކަސް މި ރިޕޯޓުގައި އަޅުގަނޑު އެކަންތަކަށް އަލިއަޅުވާކަށް ނެތީމެވެ.

މާޒީގެ ހާލަތު ބަދަލުކޮށް މިނިވަންކަމާއެކު ސަރުކާރަށް ފާޑުކިޔުމުގެ ހައްގު މި ސަރުކާރުން ހޯދައިދިނެވެ. މިލިއަނުން މެންބަރުންގަނެ ފާސްކުރި އަބުރުރައްކާތެރިކުރުމުގެ ގާނޫނު މި ސަރުކާރުން ހޯދައިދިނީ އެ ފުރުސަތު ފަހިކޮށްދިނުމުގެ ބޭނުމުގައެވެ. ދުނިޔޭގައި މިހާރު ހަލުވިކަމާއެކު ފެތުރެމުން އަންނަ ކޮވިޑް-19 ރާއްޖެއިން ފެނުމާއެކު ސަރުކާރުން މި ބަލި ފެތުރިޔަނުދީ ހިފެހެއްޓުމަށް ގިނަ މަސައްކަތަކެއް އެބަކުރެއެވެ.

އެގޮތުން މިހާތަނަށްވެސް ފެނިގެންދިޔައީ ވަރަށް ޒިންމާދާރުކަމާއެކު މި ހައްސާސް ދަނޑިވަޅުގައިވެސް ހުރިހާ މައުލޫމާތެއް ހާމަކުރަމުންދާތަނެވެ. ކިތަންމެ ކުޑަ ފިޔަވަޅެއް އެޅިކަމުގައިވިޔަސް އެ ކަމުގައި ރައްޔިތުން އަމަލުކުރަމުންދާނެ ގޮތުގެ ފުރިހަމަ މައުލޫމާތު ސަރުކާރުން ދަނީ ހާމަކުރަމުންނެވެ. މިފަދަ ހައްސާސް ދަނޑިވަޅެއްގައި ރައްޔިތުންނަށް މި މައުލޫމާތު ފޯރުކޮށްދޭއިރު ވަކި މީޑިއާއެއް އިސްތިސްނާވުމެއް ނެތި ތެދު މައުލޫމާތު ފޯރުކޮށްދޭންޖެހެއެވެ. ސިޔާސީ ގޮތުން ފިކުރު ތަފާތުވިޔަސް، ގައިދީ އެއް މިނިވަންކުރުމަށް ކިތަންމެ ގޮވިޔަސް އެ މިނިވަންކަން މިހާރު އޮތްކަން އެއީ އެންމެން ގަބޫލުކުރާ ހަގީގަތެކެވެ.

ނަމަވެސް ކޮންމެ ބަޔަކުވެސް ވިސްނަންވީ އެއްކަންތައް އެބައޮތެވެ. މި ދަނޑިވަޅުގައި ރައްޔިތުންނަށް ހަގީގަތާއި ހިލާފު ބިރުވެރިކަން އުފެދޭ ފަދަ ވާހަކަތައް ނުފެތުރުމަށެވެ. އެއްބައިވަންތަވެ ސީޔާސީ ފިކުރާއި އަމިއްލަ މަސްލަހަތު ދޫކޮށް ގައުމަށް ދިމާވެފައިވާ ބަލިމަޑުކަމުން އަރައި ގަތުމަށްޓަކައި ރައްޔިތުންނަށް އުންމީދު އާކޮށްދޭންވީއެވެ. އާރުލާފައި އަޑުގެ ނެތްވަރު ދައްކައި ދޮގު މައުލޫމާތު ފަތުރަންވީކީ އެއްނޫނެވެ. މިކަން ހުއްޓުވުމަށް ބްރޯޑްކާސްޓިންގް ކޮމިޝަނުންވެސް ހަރުދަނާ ފިޔަވަޅުތަކެއް އަޅަންވެއްޖެއެވެ. އަމާޒުވެދާނެ ފާޑުކިޔުމަކަށް ނުބަލައި ރައްޔިތުންގެ މަސްލަހަތު އިސްކުރާށެވެ.