ކޮވިޑް-19 ގެ އެކިލެވެލްތަކުގައި އަމަލުކުރަންވީ ގޮތް ސްޕްރީމް ކޯޓުން އެކުލަވާލާ ސަރކިޔުލަރ އެއް ނެރެފި އެވެ.

އެގޮތުން ދިވެހިރާއްޖޭގައި ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާންކޮށްފައިވީއިރު، ކޯޓުތަކުގެ ފަނޑިޔާރުންނާއި މުވައްޒަފުންނާއި ކޯޓުތަކުގެ ޚިދުމަތްހޯއްދަވާ ފަރާތްތަކުގެ ސަލާމަތާއި ރައްކާތެރި ކަމަށްޓަކައި، ސަރުކާރުން އިޢުލާން ކުރައްވާފައިވާ ޢާންމު ޞިއްޙަތުގެ ކުއްލިނުރައްކަލުގެ ޙާލަތުގެ މުއްދަތުގައި، އަންނަނިވި ފިޔަވަޅުތައް، ދިވެހިރާއްޖޭގެ އެންމެހާ ކޯޓުތަކުން އަޅަމުން ގެންދިއުމަށް ސުޕްރީމްކޯޓުން ވަނީ އަންގާފައެވެ. އެގޮތުން:

މީގެއިތުރުން އެކި އެލަރޓް ލެވެލްތަކުގައި އަމަލުކުރަންވީ ގޮތް ސުޕްރީމް ކޯޓުން ވަނީ ކަނޑައަޅާފައެވެ.

ރީނދޫ އެލަރޓް އިއުލާންކޮށްފައި އޮންނަ ހާލަތުގައި:

- އެ ސަރަޙައްދެއްގައި ހުންނަ ކޯޓުތަކުގައި، އެ ކޯޓަކުން ކަނޑައަޅާ ގޮތެއްގެމަތިން، ގިނަ މީހުން އެއްފަހަރާ ޙާޟިރުނުކޮށް، ޝަރީޢަތްތައް ބޭއްވޭނެ އިންތިޒާމު ހަމަޖައްސަންވާނެއެވެ. މިގޮތުން، މައްސަލަތައް ބޭއްވުމުގައި މައްސަލަތައް ތާވަލުކުރަންވާނީ އެއްވަގުތަކު ގިނަ ބަޔަކު ޙާޟިރުކޮށް ބައިތިއްބަން ނުޖެހޭ ގޮތެއްގެ މަތިންނެވެ. އަދި ވަސީލަތްތައް ލިބެން ހުރިނަމަ، ކޮންމެހެން ބާއްވަންޖެހޭ މައްސަލަތައް، ވީޑިއޯ ނުވަތަ އޯޑިއޯ ލިންކްގެ އެހީގައި ބޭއްވުމުގެ ކަންކަން އިންތިޒާމު ކުރަންވާނެއެވެ. މީގެ ތެރޭގައި، ޑިސްޕިއުޓް ރިޒޮލިއުޝަން މަރުޙަލާގައި ބަލާ މައްސަލަތަކުގައި ފޯނު ނުވަތަ އީ-މެއިލް މެދުވެރިކޮށް ޖަވާބުދާރީވުމުގެ ފުރުޞަތު ދެވެން އޮތްނަމަ، ދެވިދާނެއެވެ.

- މައްސަލައަކާ ގުޅިގެން ކޯޓަށް ޙާޟިރުވާންޖެހޭ ފަރާތަކީ ޢުމުރުން 55 އަހަރުވެފައިވާ ނުވަތަ ރިސްކް ކެޓަގަރީއެއްގައި ހިމެނޭ ފަރާތަކަށްވެފައި، އެފަރާތަކުން ކޯޓަށް ޙާޟިރުވުމަށް އިޢުތިރާޟުކުރާނަމަ، އެފަރާތަކީ އެފަދަ ގިންތިއެއްގައި ހިމެނޭ ފަރާތެއްކަން އެނގޭނެ ލިޔުމަކާއެކު ހުށަހެޅުމުން، އެއީ މިޙާލަތުގައި، ކޯޓަށް ޙާޟިރުނުވުމަށް މަޤުބޫލު ޢުޒުރެއް ކަމުގައި ބަލަންވާނެއެވެ.

އޮރެންޖް އެލަރޓް އިޢުލާންކޮށްފައި އޮންނަ ޙާލަތުގައި:

- އެއް ފަނޑިޔާރަށް ވުރެ ގިނަ ފަނޑިޔާރުން ތިބޭ ކޯޓުތަކުގައި، ޑިއުޓީ ތާވަލެއް އެކުލަވާލައި،ފަނޑިޔާރުން މަސައްކަތްކުރާނެ އިންތިޒާމު ހަމަޖައްސަންވާނެއެވެ.

- ބަންދުކުރެވޭ މީހުންގެ ބަންދާމެދު ގޮތެއް ކަނޑައެޅުމުގެ އަޑުއެހުންތަކާއި، ކަނޑައެޅިގެން ކޯޓުތަކުންވަކި ވަގުތެއްގައި ނުވަތަ އަވަސް ފިޔަވަޅުތަކެއް އަޅަންޖެހޭ ކަންކަން (މީގެ ތެރޭގައި، ގެވެށި އަނިޔާއާއި ކުޑަކުދިންގެ ޙައްޤުތަކާބެހޭ އަމުރުތައް ހޯދުމުގެ މައްސަލަތައްހިމެނޭ) ފިޔަވައި، މީހުން ޙާޟިރުކޮށްގެން ހިންގަންޖެހޭ މައްސަލަތައް މި މުއްދަތުގެ ތެރޭގައި ހިންގައިގެން ނުވާނެއެވެ.

- ކޯޓަށް ހުށަހަޅާ ސިޓީއާއި މައްސަލަތަކާއި ލިޔެކިޔުން، އީ-މެއިލް ނުވަތަ އެހެންވެސް، އެ ކޯޓަކުން ކަނޑައަޅާ އިލެކްޓްރޯނިކް ވަސީލަތެއް މެދުވެރިކޮށް ހުށަހެޅުމުން، އެއީ އެ ކޯޓަށް ރަސްމީގޮތުންލިބިފައިވާ ލިޔުމެއްކަމުގައި ބަލަންވާނެއެވެ. އަދި ކޯޓުގެ ފަރާތުން ފޮނުވާ ސިޓީއާއި، އަމުރުތަކާއި އެހެނިހެން ލިޔެކިޔުން، އިލެކްޓްރޯނިކް ވަސީލަތެއް މެދުވެރިކޮށް ފޮނުވުމުން، އެއީ އެ ކޯޓުން ރަސްމީގޮތުން ފޮނުވާފައިވާ ލިޔުމެއްކަމުގައި ބެލޭނެއެވެ.

- އިލެކްޓްރޯނިކްކޮށް ލިޔެކިޔުންތަކުގައި ސޮއިކުރެވެން ނެތްނަމަ، މުވައްޒަފުންނާއި ފަނޑިޔާރުންގެ ރައްކާތެރިކަމަށް ރިޢާޔަތްކޮށް، އެ ކޯޓަކުން ނުވަތަ އެ ޖުޑީޝަލް ދާއިރާއަކުން އިންތިޒާމުކުރާ ގޮތެއްގެ މަތިން ލިޔެކިޔުމުގައި ސޮއިކުރާނެ އިންތިޒާމް ހަމަޖައްސަންވާނެއެވެ.

- ޢުމުރުން 55 އަހަރުވެފައިވާ ނުވަތަ ރިސްކް ކެޓަގަރީއެއްގައި ހިމެނޭ ފަނޑިޔާރުން، ޖުޑީޝަލް ސަރވިސް ކޮމިޝަނުން އަންގާ ގޮތެއްގެމަތިން، ގޭގައި މަސައްކަތްކުރުމުގެ ކަންކަން ހަމަޖައްސަންވާނެއެވެ.

ރަތް އެލަރޓް އިޢުލާންކޮށްފައި އޮންނަ ޙާލަތުގައި:

- ކޯޓުތަކުން ހަމައެކަނި ކުރާނެ މަސައްކަތަކީ ބަންދުކުރެވޭ މީހުންގެ ބަންދާމެދު ގޮތެއް ކަނޑައެޅުމާއި،ކޯޓުން ކޮންމެހެން ނެރެންޖެހޭ (މީގެ ތެރޭގައި، ގެވެށި އަނިޔާއާ ގުޅޭ އަމުރުތައް ހިމެނޭ ގޮތުން) އަވަސް އަމުރުތައް ނެރުމުގެ ކަންކަން ކުރުމެވެ.

-ޢުމުރުން 55 އަހަރުވެފައިވާ ނުވަތަ ރިސްކް ކެޓަގަރީއެއްގައި ހިމެނޭ ފަނޑިޔާރުން، ޖުޑީޝަލް ސަރވިސް ކޮމިޝަންއިން އަންގާ ގޮތެއްގެމަތިން، ގޭގައި މަސައްކަތްކުރުމުގެ ކަންކަން ހަމަޖައްސަންވާނެއެވެ.

ސުޕްރީމް ކޯޓުން އިތުރަށް ބުނެފައިވަނީ މިއިރުޝާދާ އެއްގޮތަށް ކުއްލި ނުރައްކަލުގެ ހާލަތު ނިމުމަކަށް ގެންނަންދެން ކަމަށް މިސަރކިޔުލަރ ގައި ބުނެފައިވެ އެވެ.