ދިވެހިރާއްޖޭގައި އާއްމު ސިއްހަތުގެ ކުއްލި ނުރައްކަލުގެ ހާލަތު އިޢުލާންކޮށާފައިވާތީ ފަނޑިޔާރުންނަށް ސަލާމަތްތެރި މާހައުލެއްގައި މަސައްކަތް ކުރެވޭނެ ގޮތްހެދުމާއެކު ރައްޔިތުންނަށް ކޯޓުތަކުން ލިބޭ ހިދުމަތްތައް މެދުނުކެނޑޭނެގޮތަށް ފޯރުކޮށްދިނުމުގެ ގޮތުން ޖުޑީޝަލް ސަރވިސް ކޮމިޝަނުން (ޖޭއެސްސީ) ފިޔަވަޅުތަކެއް އެޅުމަށް ނިންމާފައިވާކަމަށް އެކޮމިޝަނުން ބުނެފި އެވެ.
އެގޮތުން އަޅަން ނިންމާފައިވާ ފިޔަވަޅު ތަކަކީ:
- ހެލްތް ޕްރޮޓެކްޝަން އެޖެންސީގެ ލަފަޔާ އެއްގޮތަށް، ފަނޑިޔާރަކު ސެލްފް އައިސޮލޭޝަން ނުވަތަ އައިސޮލޭޝަން ނުވަތަ ކޮރެންޓިން ކުރެވިއްޖެނަމަ، އެފަނޑިޔާރަކު އެކަން ޖުޑީޝަލް ސަރވިސް ކޮމިޝަނަށް އެންގުން.
- މިފަދައިން އަންގާނީ ކޮމިޝަންގެ 7821400 ނަންބަރަށް ޓެކްސްޓް މެސެޖަކުން ކަމަށް ޖޭއެސްސީން ބުނެއެވެ. ވީޓެކްސްޓް މެސެޖުގައި ފަނޑިޔާރުގެ ނަން، އައިޑީ ކާޑު ނަންބަރު އަދި ކޯޓު ބަޔާން ކުރަންޖެހެއެވެ. ފަނޑިޔާރަކު ސެލްފް އައިސޮލޭޝަން ނުވަތަ ޣައިލޭޝަން ނުވަތަ ކޮރެންޓީންގައި ހުންނަވާ މުއްދަތުގައި ކޯޓަށް ހާޒިރުނުވެވޭ ދުވަސްތައް އަހަރީ ޗުއްޓީ ނުވަތަ އެހެނިހެން ޗުއްޓީތަކުން ނުކެނޑޭގޮތަށް އަދި މުސާރައާއި އިނާޔަތްތައް ލިބޭގޮތަށް ހަމަޖެއްސޭނެ ކަމަށް ޖޭއެސްސީން ބުނެއެވެ.
- ކޮވިޑް-19 އާ ގުޅިގެން އޮރެންޖް އެލަރޓް އިޢުލާން ކުރެވޭ ސަރަޙައްދެއްގެ ކޯޓުގައި ތިއްބެވި، އުމުރުން 55 އަހަރުން މަތީ ފަނޑިޔާރުންނާއި ހައި ރިސްކް ކެޓަގަރީގައި ހިމެނޭ ހިތުގެ ފުއްޕާމޭގެ ކެންސަރު، ހަކުރުބަލި ފަދަ ދާއިމީ ބައްޔަކަށް ފަރުވާ ހޯއްދަވާ ފަނޑިޔާރުންނާއި މާބަނޑު ފަނޑިޔާރުން ގޭގައި މަސައްކަތް ކުރައްވަންބޭނުން ފުޅުނަމަ، އެކަން ޖުޑީޝަލް ސަރވިސް ކޮމިޝަނަށް އެންގުމުން، ކޮމިޝަނުން ކަނޑައަޅާ އުސޫލުގެ ދަށުން އެއިންތިޒާމް ހަމަ ޖައްސަދެވޭނެ. އަދި މި ގޮތަށް މަސައްކަތް ކުރައްވާ ފަނޑިޔާރުން މިގޮތަށް މަސައްކަތްކުރާ ދުވަސްތަކަކީ ކޯޓަށް ހާޒިރުވެ މަސައްކަތް ކުރާދުވަސްތަކެއްގެ ގޮތުގައި ބެލޭނެ ކަމަށް ޖޭއެސްސީން ބުނެއެވެ.
ޖޭއެސްސީން ބުނީ އެޗްޕީއޭއިން ނެރޭ އެލާރޓް ލެވެލްތަކާ ގުޅިގެން ދިވެހިރާއްޖޭގެ ސުޕްރީމް ކޯޓުން 17 މަރޗްގައި ނެރެފައިވާ ސަރކިއުލާއިން އަންގާފައިވާ ގޮތަށް އަމަލުކުރުމަށް ފަނޑިޔާރުންނާއި ކޯޓުތަކުގެ މުވައްޒަފުންނަށް ކޮމިޝަނުން އިލްތިމާސްކުރާ ކަމަށެވެ. އަދި މިސަރކިއުލަރގެ މުއްދަތަކީ 17 މަރޗުން ފެށިގެން އާންމު ސިއްހަތުގެ ކުއްލި ނުރައްކަލުގެ ޙާލަތު ނިމުމަކަށް އައުމާހަމައަށް ކަމަށް ޖޭއެސްސީން ބުނެއެވެ.
ޖޭއެސްސީން ފަނޑިޔާރުން ކަންކުރަންވީ ގޮތް އެކުލަވާލާފައިވާއިރު މީގެކުރިން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ވަނީ ޖުޑީޝަރީ ދާއިރާގައި މަސައްކަތްކުރާ ފަރާތްތަކުން އެކި ލެވެލްތަކުގައި އަމަލުކުރަންވީ ގޮތް އެކުލަވާލާ އެކަންކަން ނެރެފަ އެވެ.
