ކޮވިޑް-19 އިން ރައްކާތެރިވުމަށް ކުރާ މަސައްކަތުގައި ޚާއްސަ ސަމާލުކަމެއް ދުވަސްވީ މީހުންނަށް ދިނުމަށް ދިވެހިރާއްޖޭގެ އިސްރަށްވެހިންގެ ޖަމިއްޔާއިން ގޮވާލައިފިއެވެ.
އިސްރަށްވެހިންގެ ޖަމިއްޔާއިން ބުނީ މިދުވަސްވަރު ދުނިޔޭގައި ހަލުވިކަމާއެކު ފެތުރެމުންމިދާ "ކޮވިޑް19" ގެ ރޯގާ ރާއްޖެއިން ފެނިފައިވާތީ ރައްކާތެރިވުމުގެ ގޮތުން ގިނަ މަސައްކަތައް ކުރަންޖެހޭ ކަމަށެވެ.
މި ރޯގާގެ އަސަރު އެންމެ ބޮޑަށް، އެންމެއަވަހަށް ކުރަނީ، ދުވަސްވީ މީހުންނަށް ކަމަށްސިއްހީ ހޯދުންތަކުން ދައްކަން ފާހަގަކުރައްވައި އެޖަމިއްޔާއިން ބުނީ މިނުރައްކާތެރި ވަބާއިން ސަލާމަތްވުމަށް އެމީހަކަށް ކުރެވެން ހުރި ހުރިހާ މަސައްކަތެއް ކުރަންޖެހޭ ކަމަށާއި، މިމަސައްކަތް ކުރުމުގެ ފަސްނުޖެހުމަށް އެދޭ ކަމަށެވެ. އަދި އާއިލާތަކުގައި ތިބި ދޮށީ އުމުރުގެ މީހުންނަށް އާއިލާތަކުން ޚާއްސަ ސަމާލުކަމެއް ދިނުމަށް ވަނީ އެދިފައެވެ.
އިސްރަށްވެހިންގެ ޖަމިއްޔާއިން ބުނީ ދިވެހި ސަރުކާރުގެ ސިއްހީ އިދާރާތަކުން ދެމުންދާ އިރުޝާދު ތަކާއި ޑޮކްޓަރުންގެ ލަފާއާ އެއްގޮތަށް އަމަލުކުރުމަށް އިލްތިމާސްކުރާ ކަމަށެވެ. އަދި މީހުން ގިނަތަންތަނަށް ނުދިއުމަށާއި ޚާއްޞަ ގޮތެއްގައި އަތްދޮވެ ސާފުކޮށް ބެހެއްޓުމަށް ވަނީ އިލްތިމާސްކޮށްފައެވެ.
