ހުޅުމާލެ ފޭސް-2 ގެ އިރުމަތީ ފަރާތުން ބީޗުން ޓޫރިސްޓުންނަށް ހާއްސަކޮށް ސަރަހައްދެއް ކަނޑައަޅައިފިއެވެ.

ގެސްޓް ހައުސް އެސޯޝިއޭޝަން އޮފް މޯލްޑިވްސް (ގޭމް) އިން ބުނީ ހުޅުމާލެ އިރުމަތީ ފަރާތު ބީޗް ސަރަހައްދުން ހުޅުމާލޭގެ ގެސްޓްހައުސްތަކުގައި އުޅޭ އަދި ޒިޔާރަތްކުރާ ފަތުރުވެރިންނަށް ޚާއްސަކޮށް މޫދަށް އެރި އުޅުމަށް ޓޫރިސްޓް ބީޗް"ގެ ގޮތުގައި ބޭނުންކުރުމަށް ސަރަހައްދެއް ހޯދުމަށް އެސޯސިއޭޝަނާއި ހުޅުމާލޭގެ ގެސްޓްހައުސްތަކުގެ ވެރިން ގުޅިގެން ކުރެވުނު މަސައްކަތުންވަނީ އެކަމަށް ހާއްސަ ސަރަހައްދެއް ލިބިފައިވާ ކަމަށެވެ.

އެގޮތުން ހުޅުމާލެ ފޭސް-2 ގެ އިރުމަތީ ފަރާތު ސަރަހައްދުން ބައެއް ޓޫރިސްޓުން ބޭނުންކުރުމަށް ހުޅުވާލުމަށް ހައުސިންގ ޑިވެލޮޕްމެންޓް ކޯޕަރޭޝަން ނިންމާފައިވާ ކަމަށް ގޭމްއިން މައުލޫމާތުދެއެވެ.

ގޭމްއިން ބުނީ ޓޫރިސްޓް ބީޗް ބޭނުންކުރުމުގައި ގެސްޓްހައުސްތަކުން ހާއްސަ ސަމާލުކަމެއްދޭން ޖެހޭ ކަމަށެވެ.

އެގޮތުން އެސަރަހައްދު ބޭނުންކުރަންވާނީ ހެނދުނު 6:00 އިން ހަވީރު 18:00 އަށާއި، އެސަރަހައްދު ބޭނުންކުރާ ފަރާތްތަކުން އެސަރަހައްދު ސާފުކޮށް ބޭއްވުމާއި، އެ ބީޗް ސަރަހައްދު ބޭނުންކުރުމުގައި އެސަރަހައްދު ބޭނުންކުރާ އެހެން ފަރާތްތަކަށް އުނދަގޫ ނުވާނެ ގޮތަކަށް ބޭނުންކުރުމާއި އެސަރަހައްދު ބޭނުންކުރާ ފަރަތްތަކުގެ އަތުން އެއްވެސް ފީއެއްނުނެގުމުގެ އިތުރުން ހުޅުމާލެ ފޭސް 2 އަކީ މިހާރުވެސް ކޮންސްޓްރަކްޝަން މަސައްކަތް ކުރަމުންދާ ތަނަކަށްވެފައި، ޓޫރިސްޓް ބީޗް ބޭނުންކުރާފަރާތްތަކުގެ ސަލާމަތާއި ރައްކާތެރިކަން ޔަޤީން ކޮށްދިނުމަކީ ގެސްޓްހައުސް ތަކުގެ ޒިންމާއެއް ކަމަށެވެ.

ގޭމްއިން ބުނީ އެއްގަޅުމަގުން ޓޫރިސްޓުން ބީޗް ސަރަހައްދަށް ފަތުރުވެރިން ގެންދިއުމަށް ބޭނުންވާ ގެސްޓްހައުސްތަކުން އެކަމަށް އެދި ހައުސިންގޑިވެލެޕްމެންޓް ކޯޕަރޭޝަން އަށް ހުށައެޅުމުން އެކަން ހަމަޖެހިގެންދާނެ ކަމަށެވެ.