ލުބުނާނުގެ ސިޔާސީ ފަރާތްތައް އެ ފަރާތްތަކުގެ މުސާރަ ކޮވިޑް-19 ގެ ނުރައްކަލުން ރައްކާތެރިވުމަށް ކުރާ މަސައްކަތްތަކަށް އެހީވުމުގެ ގޮތުން ހަދިޔާ ކުރުމަށް ނިންމައިފިއެވެ.

އާދިއްތަ ދުވަހު ލުބުނާންގައި ސިއްޙީ ކުއްލި ޙާލަތު އިއުލާނު ކޮށްފައިވާއިރު، ވައިރަސް ފެތުރުނަ ނުދިނުމަށްޓަކައި 2 ހަފްތާއަށް އެ ޤައުމު ލޮކްޑައުން ކުރުމަށްވެސް ވަނީ ނިންމާފައެވެ. އޭގެ އިތުރުން، ޕްރައިވެޓް ކޮމަރޝަލް ވިޔަފާރިތައްވެސް ބަންދުކޮށްފައިވާއިރު، ސިއްޙީ ކުއްލި ޙާލަތު އިއުލާނުކުރި ހިސާބުން އެ ޤައުމުގެ ސިޔާސީ ގިނަ ފަރާތްތައް ދަނީ އެ ފަރާތްތަކުގެ މުސާރަ ކޮވިޑް-19 އިން ރައްކާތެރިވުމަށް ކުރާ މަސައްކަތްތަކަށް ބޭނުން ކުރުމަށް ހަދިޔާ ކުރުމަށް ނިންމާފައެވެ.

ލުބުނާނުގެ މީޑިއާތަކުން ރިޕޯޓުކުރާ ގޮތުން އެ ޤައުމުގެ 20 އަށްވުރެ ގިނަ މަޖިލިސް މެމްބަރުންނާއި، އެތަކެއް ވަޒީރުންނެއް ވަނީ މިހިނގާ މާރޗު މަހުގެ މުސާރަ ހަދިޔާ ކުރުމަށް ނިންމާފައެވެ. އެގޮތުން ސިއްޙީ ދާއިރާގެ ކުރީސަފުގައި މަސައްކަތް ކުރާ ފަރާތްތަކާއި، ލުބުނާނުގެ ރެޑް ކޮރޮސްއާއި، ޕަބްލިކް ހޮސްޕިޓަލުތަކާއި، އެ ޤައުމުގެ ސިއްޙަތާބެހޭ ވަޒީރު އެކުލަވާލާފައިވާ "ނޭޝަނަލް ކޮރޯނާ ޑިފެންސް ފަންޑް" އަށް ފައިސާގެ އެހީތެރިކަން ފޯރުކޮށްދިނުމަށް އެ ފަރާތްތަކުން އެދިފައިވެއެވެ.

ލުބުނާންގައި 100 އަށްވުރެ ގިނަ މީހުންނަށް މި ވައިރަސް ޖެހިފައިވާއިރު، ވައިރަސް ފެތުރެން ފެށި މި ދަނޑިވަޅަކީ ފާއިތުވި 10 ވަރަކަށް އަހަރުގެ ތެރޭގައި އެ ޤައުމު އިޤްތިސާދީ ގޮތުން އެންމެ ބޮޑަށް ދަށްވެގެންދިޔަ ދަނޑިވަޅެވެ. އެގޮތުން އެ ޤައުމުގެ ލޯކަލް ކަރަންސީގެ އަގު 40 އިންސައްތައަށްވުރެ ބޮޑަށް ދަށްވެ، އިމްޕޯޓު ކުރާ މިންވަރުވެސް ދަށްވުމުގެ ސަބަބުން މެޑިކަލް ސަޕްލައިތައް އިމްޕޯޓް ކުރުމަށްވެސް އޮތީ ދަތިވެފައެވެ.