ރާއްޖެއިން ކޮވިޑް-19 ފެނުމާއި ގުޅިގެން، ގައުމުގެ މިހާރުގެ ހާލަތާ ގުޅޭ ގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގައުމާ މުހާތަބު ކުރައްވާ ގޮތަށް ހަމަޖެހިއްޖެއެވެ.

ރައީސް އޮފީހުން ކޮށްފައިވާ ޓުވީޓެއްގައި ބުނެފައިވަނީ، ރައީސް ސޯލިހު ބުރާސްފަތި ދުވަހުގެ މެންދުރު 14:00 ގައި ރާއްޖޭގެ ރައްޔިތުންނާއި މުހާތަބްކޮށް ވާހަކަދައްކަވާނެކަމަށެވެ. މިއީ ދުނިޔޭގައި ހަލުވިކަމާއިއެކު ފެތުރެމުންދާ ނުރައްކާތެރި ބަލި ރާއްޖެއިން ފެނުނު ފަހުން އެމަނިކުފާނު ރައްޔިތުންނާއި މުހާތަބްކޮށް ވާހަކަ ދައްކަވާ ފުރަތަމަ ފަހަރެވެ.

ގައުމު މިއޮތް ހާލަތުގައި ވަލިއްޔުލް އަމްރުގެ މަގާމުގައި ހުންނަވައި ގައުމާ މުހާތަބް ނުކުރައްވުމާއި ގުޅިގެން އިދިކޮޅު ފަރާތްތަކުން ވަރަށް ބޮޑަށް ފާޑުކިޔަމުން ދާއިރު، މިއަދުގެ ވާހަކަފުޅުގައި ބަލިމަޑުކަމާ ގުޅިގެން ރާއްޖެއިން ކުރަމުން އަންނަ މަސައްކަތްތަކާއި އިގްތިސާދަށް ދިމާވަމުން އަންނަ ލޮޅުންތަކުން އަރައިގަތުމަށް ކުރަމުންދާ މަސައްކަތް ހިއްސާކުރައްވާނެކަމަށް ބެލެވެއެވެ.

ދުނިޔޭގައި މިބަލި އާންމުވުމާއި ގުޅިގެން ރާއްޖެއިން ބަލި ފެނިއްޖެ ހާލަތެއްގައި އަމަލުކުރަމުންދާނެ އުސުލުތައް ކަނޑައަޅައި ރައީސް ސޯލިހުގެ އިރުޝާދުގެ ދަށުން ކަމާއި ބެހޭ އިދާރާތަކުން ވަނީ ވަރަށް ރަނގަޅަށް ތައްޔާރުވެފައެވެ. އެގޮތުން ބަލި ރާއްޖެއިން ފެނުމުމުގެ ކުރިން، ކަރަންޓީނުކުރާނެ ތަންތަނާއި ބޭނުންވާނެ ވަސީލަތްތައް ސަރުކާރުން ވަނީ އިންތިޒާމްކޮށްދީފައެވެ.

ނޯޓް: ޚަބަރު ޕަބްލިޝް ކުރި ފަހުން، ރައީސް ސާލިހު ގައުމާ މުހާތަބު ކުރެއްވުން 16:00 އަށް ވަނީ ލަސްކުރެވިފައެވެ.