ދުނިޔޭގައި މިހާރު ހަލުވި ކަމާއެކު ފެތުރެމުންދާ ނޮވެލް ކޮރޯނާވައިރަސް (ކޮވިޑް-19) އިޓަލީގައި ފެތުރެމުންދާތީ ޗައިނާގެ ސިއްހީ މާހިރުންގެ ޓީމެއް އިޓަލީއަށް ފޮނުވައިފި އެވެ.

ޗައިނާގެ ފޮރިން މިނިސްޓްރީގެ ތަރުޖަމާނު ހުއާ ޗުންޔިންގ އަންގާރަ ދުވަހު ކުރައްވާފައިވާ ޓްވީޓެއްގައި ވިދާޅުވެފައިވަނީ، ޗައިނާގެ ސްޓޭޓް ކައުންސިލަރ އަދި ފޮރިން މިނިސްޓަރު ވަންގޔި ވަނީ އިޓަލީގެ ފޮރިން މިނިސްޓަރު ލުއީގީ ޑިމާޔޯ އަށް ގުޅުއްވާ، ސިއްހީ މާހިރުންގެ ޓީމަކާއެކު ބޭނުންވާނެ ސާމާނު ވެސް އިޓަލީއަށް ފޮނުވާ އެހީތެރިކަން ފޯރުކޮށްދޭއްވާނެ ކަމަށް ވިދާޅުވެފަ އެވެ.

އެގޮތުން، ޑޮކްޓަރުންގެ ޓީމަކާއި މާސްކް އަދި ހަޒްމަޓް ސޫޓާއި އަދި ބޭނުންވާނެ ސާމާނުތަކާއެކު އިޓާލީއަށް މިހާރު މިވަނީ ފޮނުވާފަ އެވެ.

މިދިއަ ޑިސެމްބަރު މަހު ޗައިނާގެ ވޫހާން ސްޓޭޓުން އެންމެ ފުރަތަމަ މިބަލި ފެނި، ކުޑަ ދުވަސްކޮޅެއްގެ ތެރޭގައި މުޅި ޗައިނާ އެބަލީގެ ސަބަބުން ނުރައްކަލުގެ ތެރެއަށް ވައްޓާލައި 80،000 އަށްވުރެ ގިނަ މީހުންނަށް ކޮވިޑް-19 ޖެހި އަދި މިބަލީގައި 3100 އށްވުރެ ގުނަ މީހުން މަރުވެފައި ވެއެވެ.

ނަމަވެސް ޗައިނާގެ ސަރުކާރުން އެޅި ޚާއްސަ ފިޔަވަޅުތަކާއެކު އެގައުމުގައި މިހާރު ބަލި ވަނީ ވަރަށް ބޮޑަށް ކޮންޓްރޯލް ކުރެވިފައެވެ. ޗައިނާ ނެގުމަށްފަހު، ކޮވިޑް-19ގެ ނުރައްކާ އެންމެ ބޮޑު އެއްގައުމަކީ އިޓަލީ އެވެ. އިޓަލީގައި 12،462 މީހަކަށް ކޮވިޑް-19 ޖެހިފައިވާއިރު، 827 މީހަކު ވަނީ މަރުވެފަ އެވެ.