ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޙާލު ރަނގަޅުކަމަށް ކޮވިޑް-19 ގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.

ބުދަ ދުވަހުގެރޭ ނޭޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ، ރާއްޖެއިން ކޮވިޑް-19 އަށް ޕޮޒިޓިވްވި 70 އަހަރުގެ މީހާގެ ޙާލު "ސްޓޭބަލް" ކަމަށާއި، އިތުރު މީހުންގެ ޙާލުވެސް ރަނގަޅު ކަމަށެވެ.

ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޙާލަތު އިތުރަށް ތަފްސީލް ކޮށްދެއްވައި ބައްދަލުވުމުގައި ބައިވެރިވެވަޑައިގަތް އައިޖީއެމްއެޗްގެ އެތެރެހަށީގެ ޑޮކްޓަރ މޫސާ މުރާދު ވިދާޅުވީ، ކޮވިޑް-19 އަށް ޕޮޒިޓިވްވި 70 އަހަރުގެ މީހާ ސްޓޭބަލް ކަމަށާއި، ނަމަވެސް އޭނާ ދަރުމަވަންތަ ހޮސްޕިޓަލަށް ގެނައީ އޭނާއަކީ އުމުރުން ދުވަސްވީ މީހަކަށްވެފައި ފުއްޕާމޭގައި މައްސަލަތަކެއް ހުރުމުން "ކްރިޓިކަލް" ވެދާނެތީ ކަމަށެވެ.

އަދި އޭނާގެ ޙާލުވެސް ގާތުން ބަލަމުންދާކަމަށް ޑޮކްޓަރ މޫސާ ވިދާޅުވިއެވެ.

ޑޮކްޓަރ އިތުރަށް ވިދާޅުވީ، ދަރުމަވަންތަ ހޮސްޕިޓަލުގެ އައިސީޔޫގައި 10 މީހުންގެ ކެޕޭސިޓީ އެބަހުރި ކަމަށާއި، ނަމަވެސް ކޭސްތަކުގެ އަދަދު އިތުރުވެއްޖެ ޙާލަތެއްގައި އިތުރު ވަސީލަތްތައް ބޭނުން ކުރާނެ ކަމަށެވެ. އެގޮތުން ކޭސްތައް އިތުރުވާ މިންވަރަކުން އައިޖީއެމްއެޗްގެ މައި އައިސީޔޫވެސް ބޭނުން ކުރަން ޖެހިދާނެ ކަމަށް ޑޮކްޓަރު ވިދާޅުވިއެވެ.

ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވެފައިވަނީ 8 މީހުންނެވެ.