ރާއްޖެއިން ފުރަތަމަ ކޮވިޑް-19 އަށް ޕޮޒިޓިވްވި ފުރަތަމަ މީހާ ފެނުނު ޅ. ކުރެއްދޫ ރިސޯޓުގެ ބައެއް ބަންދުކޮށް ރިސޯޓު ހުޅުވުމުގެ މަސައްކަތް ފަށައިފިއެވެ.

ކޮވިޑް-19 އާއި ގުޅޭ އެންމެ ފަހުގެ މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ގެ ޓާސްކްފޯހުގެ ތަރުޖަމާނު ބްރޫކް އަޒީޒު ވިދާޅުވީ ކުރެއްދޫ ރިސޯޓުގައި އެކަހެރިކޮށްފައިވާ މީހުން ވަކި ޞަރަޙައްދަކަށް ގެންގޮސް އެ ޞަރަޙައްދު ބަންދު ކުރުމަށްފަހު، ރިސޯޓު ހުޅުވާލުމުގެ މަސައްކަތް ކުރަމުންދާ ކަމަށެވެ.

ކުރެއްދޫ ރިސޯޓުން ކޮވިޑް-19 އަށް ހަތަރު މީހަކު ޕޮޒިޓިވްވެފައިވާ އިރު، އެ ރިސޯޓް އޮތީ އެލަރޓް ލެވެލް އޮރެންޖުގައެވެ. ކޮވިޑް-19 އަށް އެ ރިސޯޓުން ޕޮޒިޓިވްވެފައިވަނީ ދެ ބިދޭސީ މުވައްޒަފަކާއި އިޓަލީގެ ދެ ޓޫރިސްޓެކެވެ.

ކުރެއްދޫއާއި ގުޅޭ އެންމެ ފަހުގެ މަޢުލޫމާތު ދެއްވަމުން މަބްރޫކް ވިދާޅުވީ އެ ރިސޯޓުގައި ޑޮކްޓަރުންގެ ޓީމެއް ޙަރަކާތްތެރިވަމުންދާ ކަމަށެވެ. އަދި އެ ރިސޯޓްގައި މި ވަގުތު ރޫމް އައިސޮލޭޝަންގައި ބަޔަކު އެބަތިބި ކަމަށާއި އެމީހުންގެ ކަންކަން ޑޮކްޓަރުން މޮނިޓަރ ކުރަމުންދާ ކަމަށެވެ.

ކުރެއްދޫ ރިސޯޓުގައި 699 ޓޫރިސްޓުންނާއި 270 ދިވެހި މުވައްޒަފުންގެ އިތުރުން 420 ބިދޭސީ މުވައްޒަފުން އެބަތިއްބެވެ.

ކުރެއްދޫއިން ކޮވިޑް-19 އަށް މީހަކު ޕޮޒިޓިވްވެފައިވަނީ އެ ރަށުގައި ޗުއްޓީ ހޭދަކުރި އިޓަލީ ޓޫރިސްޓެއްގެ ފަރާތުންނެވެ. އަދި އެ ޓުއަރިސްޓް ކޮވިޑް-19 ގެ ޢަލާމާތްތައް ހުއްޓާ އޭނާއަށް ރާއްޖެ އެތެރެވެވި އަދި އޭނާ ފުރުނު މައްސަލާގެ ޖިނާޢީ ތަޙުޤީޤެއް މިހާރު ވަނީ ފަށާފައެވެ.