ބައިނަލްއަޤުވާމީ އަންހެނުންގެ ދުވަސް ފާހަގަ ކުރުމަށް ޤައުމީ ދިފާޢީ ބާރު (އެމްއެންޑީއެފް) އިން ރާވާފައިވާ "ވިމެންސް ރަން" ކެންސަލްކޮށްފިއެވެ.

ކޮންމެ އަހަރެއްގެ މާޗު މަހުގެ 8 ވަނަ ދުވަހަކީ ބައިނަލްއަޤުވާމީ ގޮތުން ފާހަގަކުރާ އަންހެނުންގެ ދުވަހަށްވާއިރު، މި ދުވަހާ ގުޅިގެން އެމްއެންޑީއެފުން ވަނީ އަންހެން ސިފައިން ބައިވެރިވާ ޚާއްސަ ދުވުމެއް މާލޭ ސިޓީ ރިންގ ރޯޑުގައި ބޭއްވުމަށް ހަމަޖައްސާފައެވެ. އެގޮތުން އާދިއްދަ ދުވަހުގެ ހެނދުނު 6:00 ގައި ދުވުން ފެށުމަށް ހަމަޖެހިފައިވީނަމަވެސް އެމްއެންޑީއެފުން ވަނީ ކުއްލިގޮތަކަށް މި ހަރަކާތް ކެންސަލް ކޮށްފައެވެ.

އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން އެމްއެންޑީއެފްގެ މީޑިއާ އޮފިޝަލު ވިދާޅުވީ، ދުވުން ކެންސަލް ކޮށްފައިވަނީ މިހާރު ދުނިޔޭގެ އެކި ކަންކޮޅުތަކުގައި ފެތުރެމުންދާ ނުރައްކާތެރި ނޮވެލް ކޮރޯނާވައިރަސް (ކޮވިޑް-19) އަށް ރާއްޖެއިން ދެ މީހަކު ޕޮޒިޓިވްވުމާ ގުޅިގެން ކަމަށެވެ.

އެމްއެންޑީއެފުން އެހެން ބުނެފައިވާއިރު، ކޮވިޑް-19 އާ ގުޅިގެން އެކުލަވާލާފައިވާ އެސްއޯޕީތަކުގައި ވައިރަސް ފެތުރިއްޖެ ޙާލަތެއްގައި އާންމުން ގިނައިން އެއްވެ އުޅޭ ތަންތަނަށް ދިއުން މަދު ކުރުމާއި، ކޮންމެހެން ކުރަންޖެހޭ ދަތުރުތައް މެނުވީ ނުކުރުން ފަދަ ކަންކަން ހިމެނިފައިވެއެވެ.

ރާއްޖެއިން ކޮވިޑް 19 އަށް ޕޮޒިޓިވްވެފައިވަނީ ޅ. ކުރެއްދޫ ރިސޯޓުގެ ދެ މުވައްޒަފުންނެވެ. އެގޮތުން ސަރުކާރުން ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ ކޮވިޑް-19 އަށް ޕޮޒިޓިވްވެފައިވަނީ ދެ ބިދޭސީން ކަމަށެވެ.