މަޤާމުގައި ހުންނެވިއިރު މަސައްކަތް ކުރައްވަމުންގެންދެވީ ދައުލަތުގެ ވަޒީރެއްގެ ދިފާޢުގައި ކަމަށް ކުރީގެ ކޮމިޝަނަރ އޮފް ޕްރިޒަންސް ޢަބްދުﷲ މުނާޒް ވިދާޅުވެއްޖެ އެވެ.

މުނާޒް މިހެން ވިދާޅުވެފައި މިވަނީ އޭނާ މަޤާމުގައި ހުންނެވިއިރު ހޯމް މިނިސްޓަރ ޝައިޚް އިމްރާން ޢަބްދުﷲ ގެ މަސައްކަތް ރަނގަޅު ކަމަށް އެމަނިކުފާނު ރާއްޖެ ޓީވީގެ "ފަލަ ސުރުޚީ ޕްރޮގުރާމުގައި ވިދާޅުވުމާއި ގުޅިގެން ކުރެއްވި ޓްވީޓެއްގައެވެ.

މުނާޒުގެ ޓްވީޓްގައި ވަނީ މަޤާމުގައި ހުންނެވިއިރު ވާހަކަ ދައްކަވަމުން ގެންދެވީ ދައުލަތުގެ މިނިސްޓަރެއްގެ ދިފާޢުގައި ކަރެކްޝަންސްގެ ސީޕީގެ ހައްޞިއްޔަތުންނެވެ.

ހޯމް މިނިސްޓަރަށް ކުފޫ ހަމަވާވަރުގެ ލީޑަރޝިޕް ކޮލިޓީ ހުރިނަމަ ލިމިޓެޑް ރިސޯސް ބޭނުންކޮށްގެން ހަމަ ކުރިން ތިބި އޮފިސަރުން މޯޓިވޭވޭޓް ކޮށްގެން ކުރި މަސައްކަތް ބަލައިގަތީސް ކަމަށް ޓްވީޓްގައި ވެއެވެ.

މުނާޒް މަޤާމުން ވަކި ކޮށްފައިވާކަން އަންގައި ރައީސް އޮފީހުން އޭނާއަށް ފޮނުވާފައިވާ ސިޓީ ޓްވިޓަރގައި ހިއްސާކުރައްވާ ފައި ވަނީ މިދިޔަ ޖެނުއަރީ މަހުގެ 21 ގައެވެ.

މުނާޒް ވިދާޅުވީ، އޭނާ މަޤާމުން ވަކިކޮށްފައިވަނީ ސަރުކާރު ކޯލިޝަންގެ އެތެރެއިންނާއި ބޭރުން ގުޅިގެން "ޖަލު ހިލުވާލުމަށް" ކުރި ކަންކަން ކާމިޔާބު ނުވުމުން ކަމަށެވެ. އަދި ވަޒީފާއިން ވަކިކުރުމަކީ ލިބުނު ކާމިޔާބީއެއްގެ ގޮތުގައި މުނާޒް ވަނީ ސިފަ ކުރައްވާފައެވެ.

މަޤާމުން ވަކި ކުރެއްވުމުން އޭނާ ގެންދެވީ މިނިސްޓަރ އިމްރާނަށް ފާޑު ވިދާޅުވެ ޓްވީޓް ކުރައްވަމުންނެވެ.

އެގޮތުން ކުރެއްވި ޓްވީޓުގައި ޖަލު އޮޑިޓް ރިޕޯޓު ގައިވާ ކަންކަމަކީ ތަންފީޒުކުރެވޭނެ ކަންކަމެއް ނޫންކަމަށް ހޯމް މިނިސްޓަރު އިމްރާން ޢަބްދުﷲ ވިދާޅުވި ކަމަށް މުނާޒް ވަނީ ތުހުމަތު ކުރައްވާފައެވެ.

"ޤައިދީންގެ ބޭސްފަރުވާ އަވަސްކުރަން، ޢަމަލީ ގޮތުން މިނިސްޓަރ އިމްރާނަށް އެއްވެސް ކަމެއް ހަމަޖައްސައި ނުދެވުނު" ކަމުގެ ތުހުމަތުތުވެސް ކުރައްވާފައި ވެއެވެ.

ސަރުކާރުން ބޭނުންވިނަމަވެސް، ޙައްޤު މިންވަރު ހޯދައި ނުދެވިގެން އުޅެނީ "ނާޤާބިލު ވަޒީރުން ގޮވައިގެން އުޅެން ޖެހިފައިވާތީ" ކަމަށްވެސް މުނާޒް ވަނީ ވިދާޅުވިއެވެ.

ހޯމް މިނިސްޓްރީގެ ދަށުން ހިންގަމުންދާ އެލްޖީއޭ، ހޯމް މިނިސްޓްރީ، ޖުވެނައިލް ޖަސްޓިސް ޔުނިޓު، މޯލްޑިވްސް ޕޮލިސް ސަރވިސް އަދި ކަރެކްޝަނަލް ސަރވިސް "ފްރީޒް ވެފަ" ހުރީ އެންމެ ވަޒީރަކާ ހެދިކަމަށް ވެސް މުނާޒް ވަނީ ވިދާޅުވެފައެވެ.