ފެނަކަ ކޯޕްރޭޝަން މެނޭޖިން ޑައިރެކްޓަރު އަހުމަދު ޝަރީފް ކުންފުނީގެ އުސޫލްތަކާ ހިލާފަށް ފެނަކައިގެ ވަޒީފާއަށް މީހުން ވައްދާ ކަމަށް ބުނެ މައްސަލަ އެންޓިކޮރޮޕްޝަން ކޮމިޝަމް (އޭސީސީ) އަށް ހުށަހަޅައިފިއެވެ.
ރާއްޖެއެމްވީ އަށް މައުލޫމާތު ދެއްވަމުން އޭސީސީގެ ރައީސް ހަސަން ލުތުފީ ވިދާޅުވީ ފެނަކަ ކޯޕްރޭޝަންގެ މުވައްޒަފުންނާ ބެހޭ އުސާލާ ހިލާފަށް ކުންފުނީގެ އެމްޑީ ޝަރީފް އެ ކުންފުނީގެ ވަޒީފާއަށް މީހުން ވައްދާ ކަމަށް ބުނެ މައްސަލައެއް އެ ކޮމިޝަނަށް ހުށަހަޅާފައިވާ ކަމަށެވެ. އަދި މައްސަލަ ހުށަހަޅާފައި ވަނީ މިދިޔަ ހަފްތާގެ ބުރާސްފަތި ދުވަހު ކަމަށް ލުތުފީ ވިދާޅުވިއެވެ.
ޝަރީފްއާ ގުޅޭ މައްސަލައެއް އޭސީސީ އަށް ހުށަހަޅާފައިވާ ކަމަށް ލުތުފީ ވިދާޅުވި ނަމަވެސް އިތުރު ތަފްސީލެއް ދެއްވާފައެއް ނުވެއެވެ.
ނަމަވެސް ޝަރީފްއާ ގުޅޭ ގޮތުން އޭސީސީ އަށް ހުށަހެޅި މައްސަލައިގެ ކޮޕީއެއް ރާއްޖެއެމްވީ އަށް ވަނީ ލިބިފައެވެ.
އެ މައްސަލައިގައި ބުނެފައި ވަނީ ފެނަކަ ކޯޕްރޭޝަން މެނޭޖިން ޑައިރެކްޓަރުގެ މަގާމުގައި ހުންނެވި އަހުމަދު ޝަރީފް ކުންފުނީގެ މުވައްޒަފުންނާބެހޭ ގަވާއިދާ ހިލާފަށް އޭނާގެ ރައްޓެހިންނާ ގާތްތިމާގެ މީހުން ވަޒީފާ އަށް ވައްދަމުންދާ ކަމަށެވެ. އެގޮތުން އެމްޑީ ޝަރީފްގެ ގާތް ރައްޓެހިންނާއި ގާތްތިމާގެ މީހުން ވަޒީފާއަށް ވައްދާފައި ވަނީ އާންމުކޮށް އަންގާ އިއުލާން ކޮށްގެން ނޫން ކަމަށް ޝަރީފްއާ ދެކޮޅަށް އޭސީސީ އަށް ހުށަހެޅި މައްސަލައިގައި ބުނެފައިވެއެވެ.
މީގެއިތުުރުން އެ މައްސަލައިގައި ބުނެފައި ވަނީ އިއުލާންނުކޮށް ފެނަކައިގެ ވަޒީފާ އަށް މީހުން ވައްދާފައި ވަނީ އެގޮތަށް އަމަލު ނުކުރުމަށް އޭސީސީ އިން ފެނަކަ އަށް އަންގާފައި ވަނިކޮށް ކަމަށެވެ. މިކަމާ ގުޅިގެން އޭސީސީގެ ރައީސް ލުތުފީ ވިދާޅުވީ ފެނަކައިގެ އެމްޑީގެ މަގާމުގައި މުހައްމަދު ނިމާލް ހުންނަވަނިކޮށް އޭސީސީ އަށް ހުށަހެޅި މައްސަލަތަކަކާއި ގުޅިގެން އިއުލާންނުކޮށް ވަޒީފާ އަށް މީހުން ނުވެއްދުމަށް އަންގާފައި ވާނެ ކަމަށެވެ. އެ އސޫލް ބަދަލު ކުރުމަށް ވެސް އަންގާފައި ވާނެ ކަމަށާއި އަދި އުސޫލް ބަދަލު ނުކޮށް ވާނަމަ އެކަން ބަލާނެ ކަމަށް ލުތުފީ ވިދާޅުވިއެވެ.
މި މައްސަލައާ ގުޅޭ ގޮތުން ފެނަކައިގެ އެމްޑީ ޝަރީފް ވިދާޅުވީ އިއުލާން ނުކޮށް ކުންފުނީގެ އެއްވެސް މަގާމަށް އެއްވެސް މީހަކަށް ވަޒީފާ ދީފައި ނުވާނެ ކަމަށެވެ. ނަމަވެސް ކުންފުނީގެ އިޖުތިމާއީ ޒިންމާގެ ދަށުން ނުކުޅެދުންތެރިކަން ހުންނަ ކުންދިންނަށާއި ހާއްސަ އެހީއަސް ބޭނުންވާ ކުދިންނަށް ވަޒީފައި ދީފައި ވާނީ އިއުލާން ނުކޮށް ކަމަށް ޝަރީފް ވިދާޅުވިއެވެ. އަދި އެ ނޫން ބަޔަކަށް އިއުލާން ނުކޮށް ވަޒީފާ ދީފައި ނުވާނެ ކަމަށް ޗަރީފް ވިދާޅުވިއެވެ.
މީގެއިތުރުން ޝަރީފް ވިދާޅުވީ އޭނާގެ ގާތް ރައްޓެހިންނަނަށް ނުވަތަ ގާތް ތޮމާގެ ކުދިންނަށް އެއްވެސް އިރެއްގައި އިއުލާން ނުކޮށް ވިޔަސް އަދި އެ ނޫން ވެސް ގޮތަކަސް ފެނަކައިން ވަޒީފާ ދީފައި ނުވާނެ ކަމަށެވެ.
