ދިވެހިންގެ މެދުގައި މަގުބޫލު ފިލްމީ ތަރިން ކަމަށްވާ އަބްދުﷲ މުއާޒާއި، މަރިޔަމް އައްޒަ ހައިޑްއަވޭގައި ހަނީމޫނު ހޭދަކުރަމުން އެބަދެއެވެ.

މި ދެ ފަންނާނުން އެރިސޯޓަށް ދިޔައީ ހުކުރު ދުވަހުގެ ވަގުތެއްގައެވެ. މާލެއިން ހަނިމާދޫއަށް މިއަދު ހެނދުނު ގޮސްފައިވާއިރު، އެރިސޯޓަށް ފުރި މަންޒަރު ރާއްޖެއެމްވީގެ ނޫސްވެރިންނަށް ވަނީ ފެނިފައެވެ.

ހަނީމޫނު ހޭދަކުރުމަށް ދިޔަ ހައިޑްއަވޭއަކީ 05 ތަރީގެ މަޝްހޫރު ރިސޯޓެކެވެ.

މުއާ އާއި އައްޒަ ކައިވެނިކޮށްފައި ވަނީ މިއަހަރުގެ ތެރޭގައި އަންނަ ރީތި ތާރީޚުތަކުގެ ތެރެއިން 20-02-2020 ވީ ބުރާސްފަތި ދުވަހު ހުޅުމާލޭގައި ބޭއްވި ހަފްލާއެއްގައެވެ. މިތާރީހުގައި ރާއްޖޭގައި 64 ކައިވެންޏެއް ވަނީ ކޮށްފައެވެ.

މިދެތަރިން ކައިވެނިކޮށްފައިވަނީ ލޯބީގެ ގޮތުން ދުވަސްކޮޅަކު އުޅުމަށްފަހުއެވެ.

ހުޅުމާލޭގައި ބޭއްވި މިކައިވެނި ހަފުލާގައި އައްޒަ ހުރީ ހުދުކުލައިގެ ވަރަށް ރީތި ހެދުމެއްގައެވެ. އަޅި ކުލައިގެ ކޯޓުގައި މުއާ ހުރިއިރު ފޮޓޯތަކުން ވަރަށް އުފާވެރިއެވެ. މީގެ އިތުރުން މިދެފަންނާނުންގެ ރަން ކިޔުމުގެ ހަފުލާ ވެސް ބައްވާފައިވަނީ ވަރަށްވެސް ކުލަގަދަކޮށެވެ. ރަން ކިޔުމުގެ ހަފުލާއަށް ދެމީހުން ލީ ދިވެހި ޘަޤާފީ ހެދުމެވެ. ދެމީހުންގެ ކައިވެނީގެ ރަނަކީ 30 ރުފިޔާ އެވެ.

މިދެތަރިންނަކީ ދިވެހިންގެ މެދުގައި މަގުބޫލުވި ފިލްމުތަކުގެ ލީޑް ރޯލުން ފެނިފައިވާ ދެފަންނާނުންނެވެ. އަދި މިހާރު ކުރިއަށްދާ ނަހުލާގެ ސީޒަން 02 ގެ ސީޒަންގައި މިދެފަންނާނުން ފެނިގެންދެއެވެ.