ކުއްޖާގެ ތަޢުލީމީ ހަޔާތަކީ އެކުއްޖެއްގެ މުސްތަގުބަލު ބިނާކުރުމުގައި އެންމެ މުހިންމު ދުވަސްވަރު ކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން ވިދާޅުވެއްޖެއެވެ.

އަހުމަދިއްޔާ އިންޓަނޭޝަނަލް ސްކޫލަށް 38 އަހަރު ފުރުން ފާހަގަކުރުމަށް ބޭއްވި އެސެމްބްލީ ޝަރަފުވެރިކޮށްދެއްވައި ވާހަކަ ދައްކަވަމުން ޑރ. އިބްރާހިމް ހަސަން ވަނީ ކޮންމެ ކުއްޖެއްގެ ތަޢުލީމީ ހަޔާތަކީ އެކުއްޖެއްގެ މުސްތަގުބަލު ބިނާ ކުރުމަށް އެޅިގެންދާ ބިންގަލެއްގެ ގޮތުގައި ސިފަކުރައްވާފައެވެ. އެއީ އެންމެ މުހިންމު ދުވަސްވަރުކަން ފާހަގަކުރައްވާ މިނިސްޓަރ ވިދާޅުވީ އެ ދުވަސްވަރަކީ ކުދިންނަށް ކަންކަން ތަޖުރިބާކުރެވި އަމިއްލައަށް ނިންމުންތައް ނިންމަން ދަސްކުރަން އެންމެ ރަނގަޅު ދުވަސްވަރުކަން ފާހަގަކުރައްވާފައެވެ.

އަހުމަދިއްޔާގެ ދަރިވަރުންނާއި މުޚާތަބުކުރައްވާ ޑރ އިބްރާހިމް ހަސަން ވިދާޅުވީ ތައުލީމު ހާސިލުކުރަމުންދާއިރު ސްކޫލަކީ އެންމެ އަޅާލުމާއި އޯގާތެރިކަން ލިބޭނެ އެއް މާހައުލުކަން ހަނދާން ކުރަންޖެހޭ ކަމަށެވެ. އަދި ކަންކަން ދަސްކުރަންވެސް އެއަށް ވުރެ ފަސޭހާ މާހައުލެއް ނޯންނާނެ ކަމަށެވެ. ސްކޫލް މާހައުލުގައި ކަންކުރަންޖެހޭ ގޮތަށް ބައެއް ފަހަރު ކަން ނުކުރެވުނު ނަމަވެސް ދެވަނަ ފުރުސަތު ލިބޭނެ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ސްކޫލެއް ސްކޫލަކަށް ވަނީ ވަކި ސަބަބުތަކަށްޓަކައި ކަމަށެވެ. ދަރިވަރުންގެ ރޯލު ވަރަށް މުހިއްމުކަން ފާހަގަކުރައްވާ މިނިސްޓަރ ވިދާޅުވީ މުދައްރިސުންނާއި ބެލެނިވެރިންގެ ރޯލު އެހާމެ މުހިއްމު ކަމަށެވެ.

ސްކޫލެއް ކުރިއަރައިގެންދާނީ އެ ސްކޫލެއްގެ މުދައްރިސުންގެ މިންނެތް މަސައްކަތުން ކަމަށް މިނިސްޓަރ ފާހަގަކުރެއްވިއެވެ. މި ޒަމާނަކީ ހަމައެކަނި އެ މުދައްރިސެއް ކިޔަވާދޭ މާއްދާ ކިޔަވައިދީގެން ފަރުޖެހޭނެ ޒަމާނެއް ނޫންކަމަށް ހަޔަރ އެޑިއުކޭޝަން މިނިސްޓަރ ވިދާޅުވިއެވެ. ދުނިޔެ ކުރިއަރަމުންދާއިރު މުދައްރިސުންގެ ބޮލުގައި ގިނަ ޒިންމާތަކެއް އެޅިފައިވާކަން ވެސް ފާހަގަކުރެއްވިއެވެ.

21 ފެބްރުއަރީ 1982ގައި މަދަރުސަތުލް އަހުމަދިއްޔާގެ ނަމުގައި ހުޅުވި ސްކޫލް ސްކޫލް އިންޓަނޭޝަންލް ސްކޫލަކަށް ބަދަލުކޮށްފައިވަނީ 2014 ވަނަ އަހަރުއެވެ.