އިންސާފު ދޭން ޖެހޭނީ ތަފާތު ކުރުމެއް ނެތި ހަމަހަމަ އުސޫލަކުން ކަމަށް އުއްތަމަ ފަނޑިޔާރު މުއްތައްސިމް އަދުނާނު ވިދާޅުވެއްޖެއެވެ.

ބުދަ ދުވަހު ދަރުބާރުގޭގައި އޮތް ފަނޑިޔާރުންގެ މަހާސިންތާ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު ވިދާޅުވީ، ފަނޑިޔާރުންނަކީ ވަކި ހުވައެއް ކޮށްގެން ތިބޭ ބައެއް ކަމަށާއި، އެ ހުވާ މަތީގައި ދެމިތިބުމަށް އަބަދުވެސް މަސައްކަތް ކުރަން ޖެހޭނެ ކަމަށެވެ.

އޭގެ އިތުރުން، އިންސާފު ލިބުމުގައި އެމީހެއްގެ މާލީ ފެންވަރާއި، ނަސްލީ ގޮތުންވެސް ތަފާތު ކުރުމެއް އޮވެގެން ނުވާނެ ކަމަށާއި، އިންސާފުގެ ކުރިމައްޗަށް އަންނަ ކޮންމެ މީހަކަށްވެސް ހަމަހަމަ އުސޫލެއް އޮންނަން ޖެހޭނެ ކަމަށް އެމަނިކުފާނު ވިދާޅުވިއެވެ.

އުއްތަމަ ފަނޑިޔާރުގެ ވާހަކަފުޅުގައި މިހާރަކަށް އައިސް ކުޑަކުދިންނަށް ގޯނާ ކުރުމާއި ފުރައްސާރަ ކުރުމުގެ މައްސަލަތައް އިތުރުވެފައިވާކަން ފާހަގަކުރައްވައި އެކަމަށްވެސް އަލިއަޅުވާލާފައިވެއެވެ.

އެގޮތުން އެމަނިކުފާނު ވިދާޅުވީ، މިފަދަ މައްސަލަތަކުގައި ޤާނޫނު ވަރަށް ރަނގަޅަށް ޑްރާފްޓް ކުރެވި ވަކި ހަމަތަކެއް ކަނޑައެޅިފައިވާ ކަމަށާއި، ޤާނޫނުގައި އޮންނަ ގޮތަށް ޢަމަލުކުރެއްވުމަށް އިލްތިމާސް ކުރައްވާ ކަމަށެވެ.

އަދި އެކަމުގައި ފަނޑިޔާރުންނާއި މެޖިސްޓްރޭޓުންނަށް ކުރިމަތިވާ ގޮންޖެހުންތަކާއި ގުޅޭގޮތުންވެސް މިއަދުގެ މަހާސިންތާގައި މަޝްވަރާ ކުރައްވާނެ ކަމަށް އެމަނިކުފާނު ވިދާޅުވިއެވެ.

މި ރަސްމިއްޔާތުގައި ޖުޑީޝަލް އެޑްމިނިސްޓްރޭޓަރ ޑރ. ޢަބްދުﷲ ނަޒީރުވެސް ވާހަކަދައްކަފުޅު ދައްކަވާފައިވާއިރު، އެމަނިކުފާނު ވިދާޅުވީ، ކުޑަކުދިންގެ އަދުލުގެ ނިޒާމުގެ ޤާނޫނު ތަންފީޒު ކުރުމުގައި ދިމާވެދާނެ ގޮންޖެހުންތަކާއި އެކަމުގެ ހައްލުތަކާއި ގުޅޭގޮތުން މަޝްވަރާ ކުރައްވާނެ ކަމަށެވެ.

ދަރުބާރުގޭގައި ފެށި މި މަހާސިންތާ ދެ ދުވަހުގެ މުއްދަތަށް ކުރިއަށްދާނެއެވެ. އެގޮތުން މި މަހާސިންތާގައި ޤާނޫނު ތަންފީޒު ކުރުމުގައި ދިމާވާ ދަތިތަކާއި، ކުޑަކުދިންގެ ޢަދުލުގެ ނިޒާމާއި ގުޅޭ މަޝްވަރާތައް ކުރެވޭނެއެވެ.