ފަނޑިޔާރުންގެ މަސްއޫލިއްޔަތަކަށްވާނީ ފަސާދައާއި ނުފޫޒުތަކުގެ ޝިކާރައަކަށްނުވެ ހުށަހެޅޭ މައްސަލަތަކުގައި އެންމެ ފުރިހަމައަށް އިންސާފު ގާއިމްކޮށްދިނުން ކަމަށް އުއްތަމަ ފަނޑިޔާރު އަހުމަދު މުއުތަސިމް އަދުނާން ވިދާޅުވެއްޖެއެވެ.
"ޤަޟާއީ އަހަރު 2020"ގެ އިފްތިތާހީ ޖަލްސާގައި ވާހަކަ ދައްކަވަމުން އުއްތަމަ ފަނޑިޔާރު ވިދާޅުވީ ފަނޑިޔާރުންގެ މަސްއޫލިއްޔަތަކަށްވާނީ ފަނޑިޔާރުން މާތްﷲ ގަންދީ ކޮށްފައިވާ ހުވާ މަތީ ދެމިތިބެ އަދުލު އިންސާފު ގާއިމްކުރުން ކަމަށެވެ. އަދި ފަސާދައާއި ނުފޫޒުތަކުގެ ޝިކާރައަކަށްނުވެ ހުށަހެޅޭ މައްސަލަތަކުގައި އެންމެ ފުރިހަމައަށް އިންސާފު ގާއިމްކޮށްދިނުން ކަމަށް އުއްތަމަ ފަނޑިޔާރު މުއުތަސިމް ވިދާޅުވިއެވެ.
އޭނާ ވިދާޅުވީ ގާނޫނު އަސާސީ އާއި ގާނޫނުން ކަނޑައަޅާފައިވާ ފަނޑިޔާރު ގޭގެ އިހްތިސޯސުން ބޭރު ނުވެ، ގާނޫނު އަސާސީ ހިމާޔަތްކުރުމަކީ ވެސް ފަނޑިޔާރުންގެ މަސްއޫލިއްޔަތެއް ކަމަށެވެ.
ފަނޑިޔާރު ގޭގެ ޒިންމާއަކީ ގާނޫނުއަސާސީން ކަށަވަރުކޮށްދީފައިވާ އަސާސީ ހައްގުތަކާއި، ގާނޫނުން ކަށަވަރުކޮށްދީފައިވާ ހައްގުތައް ހިމާޔަތްކޮށް ދެމެހެއްޓުން. ދޭދޭ ފަރާތްތަކުގެ މެދުގައި އުފެދޭ ހުސޫމަތްތަކަށް ގާނޫނީ އިމުގެ ތެރެއިން ހައްލު ހޯދައިދިނުން. ގާނޫނުގެ ހުކޫމަތް ކަށަވަރުކޮށް ނަގައްހައްޓާ ކަށަވަރުކޮށްދިނުމަކީ ހަމައެކަނި ކޯޓުތަކުގެ ޒިންމާއެއް ނޫން. އެ ޒިންމާއަކީ ސަރުކާރާއި މިނިވަން މުއައްސަސާތަކާއި، ސަލާމަތީ ހިދުމަތްތަކާއި ކައުންސިލްތަކާއި ދިވެހިރާއްޖޭގެ ބާގެ މެންބަރުންނާއި، ރައްޔިތުންގެ ވެސް ޒިންމާއެއް. ގާނޫނުގެ ހުކޫމަތް ކަށަވަރު ނުކުރެވޭނަމަ، މުޖްތަމައު ބައިބައިވެގެންދާނެ ކަމީ ޝައްކެއް އޮތްކަމެއް ނޫން،އުއްތަމަ ފަނޑިޔާރު އަހުމަދު މުއުތަސިމް އަދުނާން
އުއްތަމަ ފަނޑިޔާރު މުއުތަސިމް ވިދާޅުވީ ދިވެހި ދައުލަތުގެ ބާރުތައް އިހުތިރާމާއެކު މަސައްކަތްކުރުމުގެ މާހައުލެއް މިހާރު ގާއިމްވެފައިވާ ކަމަށެވެ. އަދި މާޒީގައި ދިމާވި ތަފާތު އެކިއެކި ނުތަނަވަސް ހާދިސާތަކުން ފިލާވަޅާއި އިބުރަތް ލިބި އެފަދަ ކަންކަން ތަކުރާރުވިޔަ ނުދިނުމަށް މަސައްކަތްކުރުމަކީ ދައުލަތުގައި ހިމެނޭ ބާރުތަކުގެ ޒިންމާއެއް ކަމަށެވެ.
އަދި ޝަރުއީ ދާއިރާ އަކީ ރައްޔިތުންގެ އިތުބާރު ލިބޭތަނަކަށް ހެދުމަށްޓަކައި ގިނަ ކަންތައްތަކެއް ކުރިއަށް ރާވަމުން އެބަގެންދަވާ ކަމަށާއި، އޭގެ ތެރެއިން ވެސް ސުޕްރީމް ކޯޓާ މެދު ދެކޭ ތަސައްވުރެއް އެބައޮތް ކަމަށެވެ. އަދި ސުޕްރީމް ކޯޓުން ވަނީ މައްސަލަތައް ބައްލަވާ ކޮންމެ ފަނޑިޔާރެއްގެ ރައުޔު ވަކިން ފާހަގަވާގޮތަށް ރިޕޯޓް ލިޔުމަށް ބަދަލުގެނެސް ކޯޓުގެ ހިދުމަތް ހޯދަން އަންނަ ފަރާތްތަކަށް ފަސޭހަ އަދި އެހެނިހެން ބަދަލުތައް ވެސް ގެނެސްފައި ކަމަށްް އުއްތަމަ ފަނޑިޔާރު ވިދާޅުވިއެވެ.
