ކޮރޯނާވައިރަސްއާ ދެކޮޅަށް ކުރަމުންދާ މަސައްކަތުގެ އެންމެ ފަހުގެ މައުލޫމާތު ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދުއާ ހިއްސާކޮށްފިއެވެ.
އަންގާރަ ދުވަހު ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒާންގް ލިޝްހޯންގް، ރައީސް ނަޝީދާ ބައްދަލުކުރައްވައި މިހާރުގެ ހާލަތާއި ބެހޭ ގޮތުން އެންމެ ފަހުގެ މައުލޫމާތު ވަނީ އަރުވާފައެވެ. އަދި މިހާރު ކޮރޯނާވައިރަސްއާ ދެކޮޅަށް އަޅާފައިވާ ފިޔަވަޅުތަކާއި އެނައްތާލުމަށް ކުރާ މަސައްކަތްތަކާއި ބެހޭ ގޮތުން ވެސް ދެބޭފުޅުން މަޝްވަރާ ކުރެއްވިއެވެ.
މިބައްދަލުކުރެއްވުމުގައި ރައީސް ނަޝީދު ވަނީ ޗައިނާ ރައްޔިތުންނަށް ޖެހިފައިވާ ހާލަތާއި މެދު ހަމްދަރުދީ ފާޅުކޮށް ވައިރަސްއާ ދެކޮޅަށް ކުރާ މަސައްކަތް ކާމިޔާބީއަށް އެދިވަޑައިގެންފައެވެ. އަދި ޗައިނާގެ ރައްޔިތުންނާއިއެކު ދިވެހިން ތިބިކަމުގެ ޔަގީންކަން އެމަނިކުފާނު ދެއްވިއެވެ.
ދުނިޔޭގައި އެކިކަންކޮޅުގައި ކޮރޯނާވައިރަސް ފެތުރެމުންދާއިރު، މިހާތަނަށް ކޮރޯނާވައިރަސްއަށް ޕޮޒިޓިވްވި މީހުންގެ އަދަދު 78000 އަށް ވަނީ އަރާފައެވެ. އަދި 1873 މީހުން ވަނީ މަރުވެފައެވެ.
