ދައުލަތުގެ ބައެއް އިދާރާތަކުގެ އީމެއިލް އަދި ޕާސްވޯޑް ލީކްވުމާއި ގުޅިގެން، އެ އެކައުންޓުގެ ތަކުގެ ޕާސްވޯޑްތައް މިހާރުން މިހާރަށް ބަދަލުކޮށް އަމިއްލަ ސޯޝަލް މީޑިއާ އެކައުންޓްތައް ރަޖިސްޓްރީ ކުރުމަށް ކޯޕަރޭޓް އީމެއިލް އެޑްރެސް ބޭނުންނުކުރުމަށް ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓްރީން ސަރުކާރުގެ އިދާރާތަކަށް އިލްތިމާސް ކޮށްފިއެވެ.

ހެކަރުން ރާއްޖޭގެ ބައެއް މުއައްސަސާތަކުގެ އިމެއިލް އަދި ޕާސްވޯޑުތައް ލީކް ކޮށްލުމާއި ގުޅިގެން ކޮމިއުނިކޭޝަން މިނިސްޓްރީން ނެރެފައިވާ ސަރކިއުލާއެއްގައި ބުނީ، އީމެއިލް އަދި ޕާސްވޯޑް ލީކްވެގެން އުޅޭކަމަށް ދެކެވޭ ވާހަކައާއި ގުޅިގެން އެ މިނިސްޓްރީއިން ބެލި ބެލުމުން ފާހަގަ ކުރެވިފައިވަނީ، ލީކްކޮށްފައިވާ އީމެއިލް އެކައުންޓްތަކަކީ ސަރުކާރުގެ ބައެއް އިދާރާތަކުގެ މުވައްޒަފުން، އެ މުވައްޒަފުންގެ އަމިއްލަ ސޯޝަލް މީޑިއާ އެކައުންޓްތައް ހެދުމަށްޓަކައި ބޭނުންކޮށްފައިވާ ކޯޕަރޭޓް އީމެއިލް އެކައުންޓްތައް ކަމަށެވެ.

ސޯޝަލް މީޑިއާ ޚިދުމަތްތަކުގެ ސެކިއުރިޓީ ކޮމްޕްރޮމައިޒް ވާ ފަހަރުތަކުގައި އެފަދަ އެކައުންޓްތަކުގެ އީމެއިލް އަދި ސޯޝަލް މީޑިއާ އެކައުންޓްގައި ބޭނުންކުރި ޕާސްވޯޑް އިންޓަނެޓްގައި ޕަބްލިޝްކުރެއެވެ. މިނިސްޓްރީން ބުނީ، މީގެ ސަބަބުން ނަހަމަގޮތުގައި އެހެން ފަރާތްތަކަށް އެކައުންޓްތައް ބޭނުންކުރުމުގެ ފުރުޞަތު ހުޅުވި ފޫނުބެއްދޭވަރުގެ ގެއްލުންތައްވެސް މެދުވެރިވެގެންދާ ކަަމަށެވެ.

އެންސީއައިޓީ އިން ހޯސްޓްކޮށްގެން ނޭޝަނަލް ޑޭޓާ ސެންޓަރުން ބަލަހައްޓަމުންދާ އެއްވެސް ސިސްޓަމެއް ކޮމްޕްރޮމައިޒް ނުވާކަން ފާހަގަކުރަމުން އެ ސަރކިއުލާގައި ބުނީ، މި ދުވަސްވަރު ދައުލަތުގެ އިދާރާތަކުގެ ސިސްޓަމްތަކަށް ވަރަށް ގިނަ ސައިބަރ އެޓޭކްތައް އަންނަމުންދާ ކަަމަށެވެ.

އެފަދަ ސައިބަރ އެޓޭކްތަކުގެ ސަބަބުން، ސެކިއުރިޓީ ބަލިކަށިކޮށް ފަރުމާކުރެވިފައިވާ ސިސްޓަމްތައް ކޮމްޕްރޮމައިޒްވުމުގެ ފުރުސަތު ބޮޑު ކަމަށެވެ.

އެންސީއައިޓީ އާއި ގުޅިގެން އެ އިދާރާއަކުން ބަލަހައްޓަމުން ގެންދާ މުހިންމު ސިސްޓަމްތަކުގެ ސެކިއުރިޓީ އެސެސްމަންޓްތައް ހަދައި އަދި އިތުރަށް ސެކިއުރިޓީ ވަރުގަދަ ކުރުމަށް އަޅަންޖެހޭ ފިޔަވަޅުތައް އެޅުމަށް ކޮމިއުނިކޭޝަން މިނިސްޓްރީން ވަނީ އިލްތިމާސް ކޮށްފައެވެ.