މެދު އުތުރު ރަށެއްގައި ދެމަފިރިއަކު ނިދާފަ ތިއްބާ ފިރިހެނަކު އެ ގެއަށް ވަދެ އަންހެން މީހާއަށް ޖިންސީ ގޯނާކުރި މައްސަލަ އެއް ބަލަމުންދާ ކަމަށެވެ.
ފުލުހުން ބުނީ، އާދިއްތަ ދުވަހު ހެނދުނު 06:20 ހާއިރު ދެމަފިރިޔަކު ނިދާފައި އޮއްވާ އެމީހުން ދިރިއުޅޭ ގެއަށް ގޮތް ނޭގޭ ފިރިހެނަކު ވަދެ އަންހެން މީހާއަށް ޖިންސީ ގޯނާކުރި މައްސަލައެއް ހުށައެޅިފައިވާ ކަމަށެވެ.
އަދި އޭގެ އިތުރުން ހޮނިހިރު ދުވަހުގެ ވަގުތެއްގައި، މެދު އުތުރު ރަށެއްގައި 38 އަަހަރުގެ ދިވެހި އަންހެނަކާއި މެދު 52 އަހަރުގެ ދިވެހި ފިރިހެނަކު ޖިންސީ ގޯނާކުރަން އުޅުނު ކަމުގެ މައްސަލައެއް ފުލުހަށް ހުށައެޅިފައިވާ ކަމަށެވެ. މި ދެ މައްސަލަވެސް ތަހުގީގު ކުރަމުންދާ ކަމަށް ފުލުހުންވަނީ ބުނެފައެވެ.
މި ފަހަކަށް އައިސް ޖިންސީ ގޯނާކުރާ މައްސަލަތައް ވަނީ ގިނަވެފައެވެ. އެކަމަކު އެކަން ކުރާ މިހުންނާ މެދު އެކަށީގެންވާ ފިޔަވަޅު ނޭޅޭތީ އާއްމުންގެ ފާޑުކިޔުންތައް ވަނީ މުއައްސަސާތަކަށް އަމާޒުވެފައެވެ. ހާއްސަކޮށް ކުޑަކުދިންނާއި ގުޅޭ ޖިންސީ ގޯނާގެ މައްސަލަތަކުގައި އިންސާފު ލިބުން ދަތިކަމަށް، ދާދި ފަހުން ރައްޔިތުންގެ މަޖިލީހުން ހިންގި ޕާލިމަންޓް އިންކުއަރީއިންވެސް ވަނީ ފާހަގަކުރެވިފައެވެ.
