މިހާރު ފެތުރެމުންދާ ކޮރޯނާ ވައިރަހާ ގުޅުވައިގެން ޓޮޓެންހަމް ހޮޓްސްޕާސްގެ މިޑްފީލްޑަރު ޑެލޭ އަލީ ކުރި ވީޑިއޯއެއްގެ މައްސަލަ އިނގިރޭސި އެފްއޭއިން ބަލަން ފަށައިފިއެވެ.
ސްނެޕްޗެޓަށް އަލީ އަޕްލޯޑްކުރި ވީޑިއޯއެއްގައި ވަނީ އެއަރޕޯޓުގައި މާސްކް އަޅައިގެން ހުރެ ކުރިމަތީ ހުރި ޗައިނާ މީހާ އެރުވުމަށްފަހު ކޮރޯނާވައިރަހާ ގުޅޭގޮތުން މަލާމާތްކުރުމުގެ ގޮތުން ވާހަކަދައްކާފައެވެ. އެ ވީޑިއޯއާ ގުޅިގެން ގިނަ ބަޔެއްގެ ފާޑުކިޔުން އޭނާއަށް އަމާޒުވުމުން އަލީ ވަނީ އެ ވީޑިއޯ ޑިލީޓް ކޮށްފައެވެ. އަދި ފަހުން ވަނީ އެކަމަށް މައާފަށްވެސް އެދިފައެވެ.
އަލީ މައާފަށް އެދުނު ނަމަވެސް، އިނގިރޭސި އެފްއޭއިން ވަނީ އެ މައްސަލަ ބެލުމަށް ނިންމާފައެވެ. އެގޮތުން އެފްއޭއިން ވަނީ އެ ވީޑިއޯއާ ގުޅާގޮތުން ކަންތައްތައް ހިނގާދިޔަ ގޮތް ރަސްމީކޮށް ލިޔުމަކުން އެ އިދާރާއަށް ފޮނުވުމަށް އަލީއަށް އަންގާފައެވެ.
ރިޕޯޓުތައް ބުނާ ގޮތުން އިނގިރޭސި އެފްއޭއިން ކުޅުންތެރިންނަށް ހަދާފައިވާ މީޑިއާ އާއި ސޯޝަލް މީޑިއާ ގަވާއިދުގައި ގިނަ ކަންތައްތަކާ އަލީ ޚިލާފުވެފައިވާތީ، މި މައްސަލައިގައި އޭނާ އަށް ސަސްޕެންޝަނެއް އައުމުގެ ފުރުސަތު ބޮޑެވެ.
