މަސް ގަންނަ އަގު ރަނގަޅުކުރުމަށް, މިސަރުކާރުގެ އެންމެ ބޮޑު ޢަމާޒަކީ މަސް ގަންނަ ވިޔަފާރީގެ ވާދަވެރިކަން އުފެއްދުން ކަމަށް ފިޝަރީޒް މިނިސްޓަރ ޒަހާ ވަހީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ޖަލްސާގައި މެންބަރަކު ވަނީ މަސްވެރިންގެ ޝަކުވާއަކީ މަހަށް ހަމަ އަގު ނުލިބޭ ކަމުގެ ޝަކުވާކަމަށާއި ހަމައަގު ހޯދައިދިނުމަށް ވަޒީރު ކުރައްވާ މަސައްކަތްތަކަކީ ކޮބައިތޯ އާއި ވާދަވެރި މާޙައުލެއްގައި މަސް ގަތުމަށް ހުޅުވާލުމުގެ ކަންކަން އޮތީ ކޮންގޮތަކަށްތޯ ސުވާލު ކުރެއްވާފަ އެވެ.

މިސުވާލަށް ޖަވާބު ދެއްވަމުން މިނިސްޓަރ ވިދާޅުވީ ހަމަ އަގަކީ ރާއްޖެއިން ބޭރުކުރާ މަސް ގަންނަ ފަރާތްތައް ހުށަހަޅާ އަގުން އެކަށީގެންވާ މިންވަރެއް މަސްވެރިންނަށް ލިބިގެންދިޔުން ކަމަށެވެ. އަދި މަސްވެރިން ބާނާ މަހަށް ހަމަ އަގު ނުލިބޭ ވާހަކަ ދެކެވެނީ ބޭރު ބާޒާރުގައި މަހުގެ އަގު ރަނގަޅު މިންވަރެއްގައި ހިފެހެއްޓޭ ދުވަސްވަރެއްގައި މަސްވެރިންނަށް އެއަގުގެ ފައިދާ އެކަށީގެންވަ ފެންވަރެއްގައި ފޯރުކޮށްނުދެވޭތީ ކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ މަސް ގަންނަ އަގު ރަނގަޅުކުރުމަށް މިސަރުކާރުގެ އެންމެ ބޮޑު ޢަމާޒަކީ މަސް ގަންނަ ވިޔަފާރީގެ ވާދަވެރިކަން އުފެއްދުން ކަމަށެވެ. މިވަގުތު ކަޅުބިލަމަސް ގަތުމުގެ ވިޔަފާރީއަކީ އެކްސްކުލޫސިވިޓީ އޮތް ވިޔަފާރިއެއް ކަމަށް މިނިސްޓަރ ވިދާޅުވި އެވެ. އެހެންކަމުން މިކަން ނައްތާލާ މިވިޔަފާރި ހުޅުވާލުމަކީ ސިޔާސަތެއްކަމަށް މިނިސްޓަރ ވިދާޅުވި އެވެ.

އަދި ބޮޑުކަންނެލި ގަތުމުގެ ވިޔަފާރިއަށް އައު ފަރާތްތައް ވަނުމަށް މިވަގުތު އެއްވެސް ހުރަހެއް ނެތް ކަމަށް މިނިސްޓަރ ވިދާޅުވި އެވެ. މިހާރު އޮތް މިއެކްސްކުލޫސިވް އެގްރީމެންޓުން ނިކުތުމުން ވާދަވެރި މާޙައުލެއް ޤާއިމުކުރެވި ކަޅު ބިލަމަސް ގަންނަން އިތުރު ފަރާތްތަކަށް ފުރުޞަތު ލިބިގެންދާނެކަމަށް މިނިސްޓަރ ވިދާޅުވި އެވެ.

އެކްސްކުލޫސިވް ކޮށް މިގޮތަށް ހަދާފައިވާ އެގްރީމެންޓްތަކުގެ މައްސަލާގައި ކޯޓާހަމައަށް އެމައްސަލަ ގޮސްފައިވާކަމަށް މިނިސްޓަރ ވަނީ ވިދާޅުވެފަ އެވެ.