ކޮރޯނާވައިރަސްއާ ގުޅިގެން ޗައިނާގެ ގިނަ ރައްޔިތުންތަކެއް މަރުވެފައިވާތީ ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙުގެ ތައުޒިޔާގެ މެސެޖެއް ޗައިނާ ރައީސް ޝީ ޖިންޕިންގއަށް ފޮނުއްވައިފިއެވެ.
އާދިއްތަ ދުވަހު ރައީސް ފޮނުއްވެވި މި މެސެޖުގައި ވަނީ، ނޮވެލް ކޮރޯނާވައިރަސްގެ ސަބަބުން އެ ޤައުމުން މަރުވެފައިވާ މީހުންގެ އާއިލާތަކަށާއި، އެ ޤައުމުގެ ސަރުކާރަށް ތައުޒިޔާ ވިދާޅުވާ ކަމަށެވެ. އަދި ޗައިނާއަށް ކުރިމަތިވެފައިވާ ޤައުމީ ކުއްލި ޙާލަތުގެ މި ދަނޑިވަޅުގައި ރާއްޖޭގެ ސަރުކާރާއި ރައްޔިތުން ޗައިނާއާއެކު ދެމިތިބިކަން ރައީސްގެ މެސެޖުގައި ވަނީ ފާހަގަކުރައްވާފައެވެ.
އޭގެއިތުރުން، މި ވައިރަސް ފެތުރުމުގެ ސަބަބުން ކުރިމަތިވަމުން ދިޔަ ކަންކަމުގައާއި، ޗައިނާގައި ތިބި ދިވެހިންނަށް އެހީތެރިވުމުގައި ޗައިނާ ސަރުކާރުގެ ފަރާތުން ރާއްޖެއަށް ވެދީފައިވާ އެއްބާރުލުމާއި އެހީތެރިކަން ރައީސްގެ މެސެޖުގައި ފާހަގަކުރައްވާފައިވެއެވެ. އަދި ޝީ ޖިންޕިންގެ ބެއްލެވުމުގެ ދަށުން މި ވައިރަސްއާ ގުޅިގެން އަވަސް ފިޔަވަޅުތަކެއް އެޅި މި ނުރައްކާތެރި ޙާލަތުން އަރައިގަނެވޭނެ ކަމުގެ ފުރިހަމަ ޔަޤީންކަން އޮތްކަމަށްވެސް ރައީސް ވިދާޅުވެފައިވެއެވެ.
ކޮރޯނާވައިރަސް ހަލުވިކަމާއެކު ފެތުރި އޭގެ ނުރައްކާ ބޮޑުވެފައިވަނިކޮށް ވުހާންގައި ތިބި ދިވެހިން އަނބުރާ ގެނައުމުގައި ޗައިނާއިން ވެދިން އެހީތެރިކަމަށް ޗައިނާ ސަރުކާރަށާއި، ޗައިނާ އިން ރާއްޖެއަށް ކަނޑައަޅާފައި ހުންނަވާ ސަފީރު ޒަންގް ލީ ޖޮންގްއަށް ރައީސް މީގެ ކުރިންވެސް ޝުކުރު އަދާކުރައްވާފައިވެއެވެ.
