އާދަޔާ ޚިލާފަށް ރަށްތައް ގިރަމުންދަނީ އިންޑިއާ ކަނޑުގައި އުފެދޭ ޚާއްސަ ހާލަތަކާއި ގުޅިގެން ކަމަށް އެންވަރަމެންޓް މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.

އާދަޔާ ޚިލާފަށް ރާއްޖޭގެ ރަށްތައް ގިރެމުންދާތީ އާދީއްތަ ދުވަހު ކަމާބެހޭ އިދާރާތައް ހާޒިރުކޮށް، ރައްޔިތުންގެ މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީ ބައްދަލުވުމެއް ބާއްވާފައިވެއެވެ. މި ބައްދަލުވުމުގައި މެމްބަރުންގެ ގިނަ ސުވާލުތަކެއް ކަމާބެހޭ އިދާރާތަކާއި ކުރިމަތި ކޮށްފައިވެއެވެ. އެގޮތުން ކޮމިޓީގައި އެންމެ ގިނައިން މެމްބަރުން ކުރެއްވި ސުވާލަކީ އާދަޔާ ޚިލާފަށް ރަށްތައް ގިރުމަކީ ކުރިންވެސް ހިނގާފައިވާ ކަމެއްތޯއެވެ.

މިނިސްޓަރ ވިދާޅުވީ އުތުރުގެ 30 ރަށަކަށް ޒިޔާރާތް ކުރި ކަމަށެވެ. އެގޮތުން ފަޅު ރަށްރަށަށާއި މީހުން އުޅޭ ރަށްރަށަށްވެސް ދަތުރު ކުރެވުނު ކަމަށެވެ. މިދަތުރުގައި ރަށްރަށް ގިރަމުންދާކަން ވަރަށް ބޮޑަށް ފާހަގަކުރެވުނު ކަމަށް މިނިސްޓަރ ވިދާޅުވި އެވެ. އަދި މި ދަތުރުގައި ރަށްރަށުގައި ދިރިއުޅެމުންދާ މީހުންނާއި ވާހަކަދެކެވުނުއިރު މިހާރު ރާއްޖޭގެ ރަށްތައް ގިރަމުންދާގޮތަށް ގިރަނީ ކޮންމެ 5 އަހަރުން، 10 އަހަރުގެ ފްރީކުއެންސީއެއްގައި ކަން އެނގުނު ކަމަށްވެސް ވިދާޅުވި އެވެ.

މިނިސްޓަރ ވިދާޅުވީ އެގޮތަށް ރަށްތައް ގިރަމުންދަނީ އިންޑިއާ ކަނޑުގައި އުފެދޭ ޚާއްސަ ހާލަތަކާއި ގުޅިގެން ކަމަށްކަމުގެ މާހިރުން ތައްޔާރުކޮށްފައިވާ ސައިންސް ރީސަރޗުތަކުން އެނގޭ ކަމަށެވެ.

އެކަމާއި ގުޅިގެން އީޕީއޭގެ އެސިސްޓެންޓް ޑިރެކްޓަރ ޒައްމަތު ޚަލީލް ވިދާޅުވީ އެ ހާލަތަށް ކިޔަނީ އިންޑިއަން ޑައިޕޯލް އޮސިލޭޝަން ކަމަށެވެ. އެގޮތުން ތިން ފޭސް އަންނަ ކަމަށެވެ.

އޭނާ ވިދާޅުވީ ރަށެއް ހެދިގެން އަންނަނީ އެތައް ޒަމާނެއް ވަންދެން އެވަރެޖްކޮށް ވައިޖެހި، ރާޅު އަންނަ، އޮއެ ދެމޭ ގޮތަށް ކަމަށެވެ. އަދި ދިގު މުއްދަތަކަށް ކަންތައްތައް އަންނަ ގޮތާއި ޚިލާފަށް ރަށަކަށް ކަންތައްތައް ކުރިމަތިވާނަމަ ރަށް އޮންނަ ގޮތަށް ކޮންވެސް ވަރެއްގެ ބަދަލެއް އަންނާނެ ކަމަށެވެ. އެގޮތުން ރަށްގިރާ ގޮތާއި، ރަށް ގިރުމުގެ މަރުހަލާތައްވެސް ތަފާތުވާނެ ކަމަށެވެ.

އޭނާ ވިދާޅުވި ގޮތުގައި "ޕޮޒިޓިވް" ފޭސް އައުމަށްފަހު ދެން އަންނާނީ "ނިއުޓްރަލް ފޭސް" ކަމަށެވެ. އަދި އާއްމު ހާލަތަށް އެޅުމާއެކު ރަށުގެ ވެލިގަނޑު އަނބުރާ އައުމުގެ ފުރުސަތު ބޮޑު ކަމަށެވެ. އެއީ ގިރި ސަރަހައްދު ހިމާޔަތް ކުރުމަށް ބޮޑު ފާރެއް ނުރާނާނަމައެވެ.

ޒައްމަތު ވިދާޅުވީ ފާއިތުވި 30 އަހަރު ތެރޭގައި 4 ފަހަރު މިގޮތަށް ހިނގާފައިވާ ކަމަށެވެ. އެއީ 5 އަހަރާއި 10 އަހަރާއި ދެމެދު ކަމަށެވެ. އަދި މިގޮތަށް ކަންކަން ވާއިރު، ރަށް ގިރާނެ މިންވަރު ބަރޯސާ ވަނީ ފޭސް އަށް ކަމަށެވެ.