ދަނޑުވެރިކަމުގެ ދާއިރާއަށް ބޭނުންވާ ފީލްޑް އޮފިސަރުން ތަމްރީންކުރުމަށް އިންޑިއާގެ ޓެމިލް ނާޑޫގެ އެގްރިކަލްޗަރަލް ޔުނިވަރސިޓީއަށް ދިޔަ ފަރާތްތައް، ތަމްރީން ފުރިހަމަކުރުމަށްފަހު އަނބުރާ މާލެއަށް އައިސްފިއެވެ.

ޔުނިވަރސަލް ފައުންޑޭޝަންގެ ދީލަތި އެހީއާއެކު ކުރިޔަށް ގެންދިޔަ މި ޕްރޮގްރާމަކީ، ދަނޑުވެރިކަމުގެ މައުލޫމާތު ދަނޑުވެރިންނަށް ފޯރުކޮށްދެވޭނެ މަގު ފަހިކުރުމަށްޓަކައި ފަންނީ މީހުން ބިނާކުރުމަށް މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް މެރިން ރިސޯސަސްއިން ކުރިޔަށް ގެންދިޔަ ޕްރޮގްރާމެކެވެ. މިއީ ހަ މަސް ދުވަހުގެ މުއްދަތަށް ކުރިޔަށް ގެންދިޔަ ކޯހެކެވެ.

އާދިއްތަ ދުވަހު އައި ބައިވެރިންނާ ޔުނިވަރސަލް ފައުންޑޭޝަންގެ އިސް ފަރާތްތަކާއި އެގްރިކަލްޗަރ މިނިސްޓަރު ޒަހާ ވަހީދު ވަނީ ބައްދަލުކުރައްވާފައެވެ. އަދި ކޯހުގެ ބައިވެރިންވަނީ ކޯހުން ދަސްވީ ކަންކަމާއި ގުޅޭ ޕްރެޒެންޓޭޝަނެއް ހިއްސާކޮށްފައެވެ.

ކޯހުގެ ބައިވެރިން ވަނީ ދިވެހި ދަނޑުވެރިން އާންމުކޮށް ތަޖުރިބާ ކުރަމުން އަންނަ ތަފާތު ބަލިތައް ތިމާވެއްޓާއި ރައްޓެހި އުކުޅުތަށް ބޭނުންކޮށްގެން ކޮންޓްރޯލް ކުރަން ދަސްކޮށްފައެވެ.

އެގޮތުން ކޯހުގެ ބައިވެރިން ވަނީ ކަންކަމުގެ ތެރޭގައި ރަށްރަށުގެ ފެންފަށަލައަށް އަންނަމުންދާ ނޭދެވޭ ބަދަލުތަކުން ރައްކާތެރިވެ ތިބުމަށް، ފެނުގެ ވަޞީލަތް މެނޭޖްކޮށް ބަލަހައްޓާނެ ގޮތްތަކާއި، ފަސް ގަނޑުގެ މުއްސަނދިކަން ދެމެހެއްޓުމަށް ކުރަންޖެހޭ ކަންކަމުގެ އިިތުރުން، މޫސުމަށް އަންނަ ބަދަލުތަކުގެ ސަބަބުން ރާއްޖެފަދަ ޖަޒީރާ ޤައުމެއްގެ ދަނޑުވެރިކަމަށް ކޮށްފާނެ ނޭދެވޭ އަސަރުތައް ކުޑަކުރަން ބޭނުންކުރާން އުކުޅުތައް އުނގެނިފައެވެ.

ކޯހުގެ ބައިވެރިންނާ މުހާތަބުކޮށް ދެއްކެވި ވާހަކަފުޅުގައި މިނިސްޓަރ ޒަހާ ވަނީ ލިބުނު މައުލޫމާތާއި ހުނަރުގެ ބޭނުން ފުރިހަމަޔަށް ހިފައިގެން، ދަނޑުވެރިންނަށް ޚިދުމަތް ކުރުމުގައި ނަމޫނާ ދައްކައިދީ ދަނޑުވެރިކަމުގެ ސިނާޢަތު އިތުރު ހަރުފަތަކަށް ގެންދިއުމަށް ސަރުކާރުން ކުރަމުން ގެންދާ މަސައްކަތުގައި ހުރިހާ ބައިވެރިންގެ ފުރިހަމަ އެއްބާރުލުން ދެއްވުމަށް އެދިފައެވެ.

މި ކޯސް ހިންގުމަށް އެހީތެރިވެދިން ޔުނިވަރސަލް ފައުންޑޭޝަންގެ ޗެއަރމަން މުހައްމަދު އުމަރު މަނިކަށް ޝުކުރުއަދާކުރައްވަމުން، މިނިސްޓަރ ޒަހާ ވަނީ އެ ފައުންޑޭޝަނުން ކުރި ހަރަދު ބޭކާރު ހަރަދަކަށް ވިޔަ ނުދޭނެކަމުގެ ޔަގީންކަން ދެއްވާފައެވެ. އަދި ކޯހުގެ ބައިވެރިންގެ ފުރިހަމަ ބޭނުން މިނިސްޓްރީން ހިފަމުން ގެންދާނެ ކަމުގެ ޔަގީންކަންވެސް އެރުވިއެވެ.

ކޯހުގައި މިނިސްޓްރީގެ މުވައްޒަފަކާއި ހއ. ކެލާ، ހދ. ނެއްލައިދޫ، ރ. ވާދު، ގއ. މާމެންދޫ އަދި ފުވައްމުލަކުން ޖުމްލަ 6 ބޭފުޅަކު ބައިވެރިވަޑައިގެންނެވިއެވެ. މި ފަރާތްތަކުން މަސައްކަތްކުރަން ހަމަޖެހިފައިވަނީ ރަށްރަށުގެ ކައުންސިލްތަކާއި ގުޅިގެންނެވެ.