ރިޔާސީ ރަށްކޮޅު "އާރަށް" ވެސް ކަރަންޓީން ފެސިލީޓީއެއްގެ ބޭނުން ކުރަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ނިންމަވައިފި އެވެ.
ކުރީގެ ރައީސް މައުމޫން އަބްދުލްޤައްޔޫމްގެ ވެރިކަމުގެ ދުވަސްވަރުން ފެށިގެން ރިޔާސީ ގަނޑުވަރެއްގެ ގޮތުގައި ބޭނުން ކުރައްވަމުން ގެންދަވާ މާލެ ކައިރީގައި ވަކިން އޮންނަ އާރަށަކީ، އެއިރެއްގެ ރައީސްކަން ކުރައްވާ ބޭފުޅަކު ބޭނުން ކުރެއްވުމަށް، ރައީސުލްޖުމްހޫރިއްޔާގެ އޮފީހުގެ ބެލުމުގެ ދަށުގައި އޮންނަ ރަށެކެވެ.
ރައީސް އޮފީހުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓަރ ޢަލީ ވަހީދު ވިދާޅުވީ، ޗައިނާގައި މިހާރު ހަލުވިކަމާއެކު ފެތުރެމުން އަންނަ އަދި މިހާރު ބައެއް ޤައުމުތަކުން ވެސް ފެންނަމުންދާ ނޮވެލް ކޮރޯނާ ވައިރަސްއާ ގުޅިގެން ދުނިޔޭގެ ގިނަ ޤައުމުތަކަށް ވެސް އެކަމުގެ ބިރުވެރިކަން ބޮޑުވެފައިވާ މިދަނޑިވަޅުގައި، ކޮރޯނާ ވައިރަސް ރާއްޖެއިން ވެސް ފެނިދާނެކަމުގެ ބިރަށާއި އަދި ފެތުރިދާނެ ކަމުގެ ބިރަށްޓަކައި، އެކަށީގެންވާ ރަނގަޅު ފިޔަވަޅުތަކެއް ސަރުކާރުން އަޅަމުންދާ ކަމަށެވެ.
އެގޮތުން ޢަލީ ވަހީދު ވިދާޅުވީ ކޮރޯނާ ވައިރަސްގެ މައްސަލަ ފެންމަތި ވުމާއި ގުޅިގެން، ދިވެހި ރައްޔިތުންގެ ސަލާމަތާއި ރައްކާތެރިކަމަށް ސަރުކާރުން އަޅަންޖެހޭ ފިޔަވަޅުތައް އެޅުމަށް ކެބިނެޓްގެ މިނިސްޓަރު ހިމެނިވަޑައިގަންނަވާ ގޮތަށް ޓީމެއް އެކުލަވާލާފައިވާ ކަމަށާއި، ކޮރޯނާ ވައިރަސް ޗައިނާގައި ހަލުވިކަމާއެކު ފެތުރެމުންދާތީއާއި އަދި ދުނިޔޭގެ ބައެއް ޤައުމުތަކުން އެވައިރަސް ފެންނަމުންދާތީ، އެވައިރަހަށް ޝައްކުކުރެވޭ މީހަކު ރާއްޖެއިން ފެނިއްޖެނަމަ ޢަމަލުކުރާނެ ގޮތުގެ ގައިޑްލައިނެއް ޤާއިމު ކޮށްފައިވާ ކަމަށެވެ. އެގޮތުން ކަރަންޓީނު ފެސިލިޓީއެއްގެ ގޮތުގައި ހަމަޖެއްސުމަށް ރައީސް ޞާލިހު އެންމެ ފުރަތަމަ ވެސް ނިންމެވީ އާރަށް ކަމަށްވެސް ޢަލީ ވަހީދު ވިދާޅުވި އެވެ.
ޢަލީ ވަހީދު ވިދާޅުވީ، ކަރަންޓީނު ފެސިލިޓީގެ ގޮތުގައި އެކޮމެޓީން ނިންމާފައިވަނީ، އެސްޓީއޯއިން ތެޔޮ ރައްކާކުރާ، ފުނަދޫ އާއި ހުޅުމާލޭގެ ދެވަނަ ފިޔަވަހީގެ ދަށުން ހުޅުމާލެއާ ގުޅާލެވިފައިވާ ފަރުކޮޅުފުއްޓާއި އާރަށް ކަމަށެވެ.
ޢަލީ ވަހީދު ވިދާޅުވީ، ކޮރޯނާގެ ވައިރަހުގެ މައްސަލަ ރާއްޖެ ނުރައްކާ ޙާލަތަކަށް ދާނަމަ، ކަރަންޓީން ފެސިލިޓީއެއްގެ ގޮތުގައި ވަކި ފަޅު ރަށެއް ހަމަޖައްސައިގެން ވިޔަސް ސަރުކާރުން އެކަން ކުރައްވާނެ ކަމަށެވެ.
ޢަލީ ވަހީދު ވިދާޅުވީ، ދިވެހި ސަރުކާރުން އެންމެ އިސްކަމެއް ދެނީ، ދިވެހި ރައްޔިތުންގެ ސަލާމަތާއި ރައްކާތެރިކަމަށް ކަމަށާއި، އެހެންކަމުން ސަރުކާރުން އަޅާ ކޮންމެ ފިޔަވަޅެއްވެސް އެޅިގެންދާނީ އެގޮތުގެ މަތިން ކަމަށެވެ.
ދިވެހި ސަރުކާރުން ބުނަނީ، ދިވެހި ރައްޔިތުން ކަންބޮޑުވާ ވަރުގެ ޙާލަތަކަށް ރާއްޖޭގެ ޙާލަތު އަދި ނުދާ ކަމަށާއި، ރާއްޖެއިން ކޮރޯނާ ވައިރަސް ޖެހިފައިވާ ކަމަށް ޝައްކުކުރަނީ އެންމެ މީހަކަށް ކަމަށާއި އެމީހާ މިވަގުތު ހުރީ ފުނަދޫގައި ހުންނަ ކަރަންޓީނު ފެސިލިޓީގައި ކަމަށެވެ. އަދި އޭނާއަކީ ކޮރޯނާ ވައިރަސް ޖެހިފައިވާ މީހެއްކަން ކަށަވަރު ނުވާކަމަށާއި ލެބޯޓަރީ ޓެސްޓްގެ ނަތީޖާ ލިބޭނީ ހޯމަ ދުވަހު ކަމަށްވެސް ސަރުކާރުން ބުނެއެވެ.
ސަރުކާރުން ވަނީ، ސަރުކާރާއި ކަމާބެހޭ އިދާރާތަކުން ރައްޔިތުންނަށް ފޯރުކޮށްދޭ މަޢުލޫމާތުގެ ބޭނުން ރަނގަޅަށް ހިފުމަށް ދިވެހި ރައްޔިތޔުންގެ ކިބައިން އެދިފަ އެވެ. ރައްޔިތުން ކަންބޮޑުވާ ޙާލަތަކަށް ރާއްޖެ އަދި ނުދާކަމަށާއި ނަމަވެސް މިފަދަ ވައިރަސްތަކާއި ރޯގާތަކުން ރައްކާތެރިވުމަށް ޢާންމު ޞިއްޙީ މިންގަނޑުން އަޅަންޖެހޭ ފިޔަވަޅުތައް އަޅައި، ރައްކާތެރިކަމާއެކު ދިރިއުޅުމުގެ އާދަތައް ބެހެއްޓުމަށްވެސް ސަރުކާރުން ވަނީ ރައްޔިތުންގެ ކިބައިން އެދިފަ އެވެ.
