ކޮރޯނާ ވައިރަސް އާއި ގުޅޭ މަޢުލޫމާތު ފޮރުވުމެއް ނެތި ވީހާވެސް ހާމަކަން ބޮޑު ގޮތެއްގައި ރައްޔިތުންނަށް ހާމަކުރުމަށް އިދިކޮޅު ކޯލިޝަނުން ގޮވާލައިފިއެވެ.

އިދިކޮޅުން ނެރުނު ބަޔާނުގައި ވަނީ އެފަދަ ނުރައްކާތެރި ބައްޔަކަށް ޝައްކު ކުރެވޭ މީހަކު ރާއްޖެއިން ފެނިފައިވާ އިރު، އެ ބައްޔާ ބެހޭ ގޮތުން ޢާންމު ރައްޔިތުން ހޭލުންތެރި ކުރުވާ، އެބައްޔާ ބެހޭ ގޮތުން ލިބިދޭން ޖެހޭ ފުރިހަމަ މަޢުލޫމާތުތައް ދިވެހި ރައްޔިތުންނަށް ފޯރުކޮށްދެއްވަމުން ގެންދެވުމަށް ސަރުކާރުގެ ކަމާ ބެހޭ ފަރާތްތަކަށް ގޮވާލާ ކަމަށެވެ. އަދި މިބައްޔާ ގުޅިގެން ރައްޔިތުންގެ ރައްކާތެރިކަށްޓަކައި އަޅަން ޖެހޭ އެންމެހާ ފިޔަވަޅުތައްއަޅުއްވާ، ފަސޭހައިން މިބައްޔަށް ޓެސްޓް ކުރެވޭނެ އިންތިޒާމު މިހާރުން މިހާރަށް ހަމަޖައްސަވާ، ރައްޔިތުންގެ ރައްކާތެރިކަމަށް އިސްކަންދިނުމަށް އިލްތިމާސްކޮށްފައިވެއެވެ. މީގެއިތުރުން، ވަމުންދާ ގޮތުގެ މަޢުލޫމާތުތައް އެއްވެސް މިންވަރަކަށް ފޮރުވުމެއް ނެތި ވީހާވެސް ހާމަކަން ބޮޑު ގޮތެއްގައި ރައްޔިތުންނަށް ހާމަކުރުމަށް ޕްރޮގްރެސިވް ކޮންގްރެސް ކޯލިޝަންގެ ފަރާތުން ވަނީ ގޮވާލާފައެވެ.

އަދި މިބައްޔަކީ ފަސޭހައިން ފެތުރޭ ބައްޔަކަށް ވާއިރު، ތުއްތު ކުދިންނާއި، އުމުރުން ދުވަސްވީ މީހުންނާއި މާބަނޑު އަންހެނުންނާއި، ސްކޫލްތަކުގެ ދަރިވަރުންނާއި، އަދިވެސް، ބަލިތައް ފަސޭހައިން ޖެހިދާނެ ކަމަށް ބެލެވޭ ޙާލަތުގައި ތިބި އެންމެންގެ ރައްކާތެރިކަމަށްޓަކައި އަޅަންޖެހޭ ފިޔަވަޅުތައްވެސް އަޅާ، ސްކޫލްތަކާއި ޢާންމުން ގިނައިން އެއްވެ އުޅޭ ތަންތަނުގެ ރައްކާތެރިކަމަށް އިސްކަން ދިނުމަށްވެސް ކޯލިޝަންގެ ފަރާތުން އިލްތިމާސްކޮށްފައިވެއެވެ.

ހަމައެއާއު އެކު އެ ފަދަ ގައިންގަޔަށް އަރާ ބޮޑެތި ބަލިތަކުން ރައްކާތެރިވެ ތިބުމަށްޓަކައި، ޞިއްޙީގޮތުން އަޅަންޖެހޭ ރައްކާތެރިކަމުގެ ފިޔަވަޅުތައް އަޅައިގެން ތިބުމަށް ރައްޔިތުންނަށްވެސް ނަޞޭޙަތްތެރިވާކަމަށެވެ. ޕްރޮގްރެސިވް ކޯލިޝަނުން ބުނީ އެކޯލިޝަނުން އަބަދުވެސް އިސްކުރާނީ ޤައުމާއި ރައްޔިތުންގެ ސަލާމަތާއި ރައްކާތެރިކަން ކަމަށްވާތީ، މިދަނޑިވަޅުގައި ރައްޔިތުންގެ ރައްކާތެރިކަމަށްޓަކައި، ކުރަންޖެހޭ ކޮންމެ ކަމެއްގައި މިކޯލިޝަންގެ ބައިވެރިވުމާއި އެއްބާރުލުން ލިބިދެވޭނެ ކަމަށެވެ.

ކޮރޯނާ ވައިރަސް ހުރި ކަމަށް ބެލެވޭ މީހަކު ރާއްޖެއިން ފެނިފައިވާ ކަމަށް ސަރުކާރުގެ ފަރާތުން އިޢުލާނުކޮށްފައިވާ އިރު، ކޮރޯނާވައިރަހަކީ ސިއްޙީ ގޮތުން ވަރަށް ނުރައްކާތެރި ވައިރަހެއްކަން ދުނިޔޭގެ ޞިއްޙީ ޖަމްޢިއްޔާތަކުންވެސް ވަނީ ފާހަގަކޮށްފައެވެ. އަދި މިއީ ދުނިޔޭގެ ޞިއްޙީ ކުއްލި ނުރައްކަލުގެ ޙާލަތެއްގެ ގޮތުގައި ޑަބްލިއު.އެޗް.އޯއިން ވެސް ވަނީ އިޢުލާނު ކޮށްފައެވެ.