ހއ އުލިގަމަށް ޔޮޓް ބަނދަރުކުރުން މަދުވެފައިވާ މައްސަލަ ހައްލުކުރުމަށް މަޝްވަރާ ކުރުމަށް އުލިގަން ޔޮޓް މަހާސިންތާއެއް ފަށައިގެން ކުރިޔަށް އެބަގެންދެއެވެ.
އެއް ދުވަހުގެ މުއްދަތަށް ކުރިޔަށް ގެންދާ މިމަހާސިންތާ ކުރިޔަށްދަނީ ކަސްޓަމްސް ބިލްޑިންގ އެވެ. މިމަހާސިންތާގައި މޯލްޑިވްސް ކަސްޓަމްސް ސަރވިސް އިން ޕްރެޒެންޓޭޝަނެއް ދިނުމަށް ވަނީ ހަމަޖެހިފަ އެވެ. މީގެއިތުރުން ޓޫރިޒަމް މިނިސްޓްރީ އާއި ޕޯރޓް ހެލްތު އަދި ޓްރާންސްޕޯޓް އޮތޯރިޓީންވެސް ޕްރެޒެންޓޭޝަން ދިނުމަށް ވަނީ ހަމަޖެހިފަ އެވެ. އަދި މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމެންޓް ކޯޕަރޭޝަން- އެމް.އައި.ޓީ.ޑީ.ސީ އާއި މޯލްޑިވްސް އެސޯސިއޭޝަން އޮފް ޔޮޓް އެޖެންޓު އަދި ރިއަލް ސީ ހޯކްސް އިންވެސް ޕްރެޒެންޓޭޝަން ދިނުމަށް ވަނީ ހަމެޖެހިފަ އެވެ.
މި މަހާސިންތާގައި ސުވާލާ ޖަވާބު ކުރިޔަށް ގެންދިޔުމަށް ހަމަޖެހިފައިވާއިރު ގްރޫޕްތަކުން ގްރޫޕް ޕްރެޒެންޓޭޝަންވެސް ދިނުމަށް ވަނީ ހަމަޖެހިފަ އެވެ.
މަހާސިންތާ ނިންމުމުގެ ގޮތުން ޑެޕިޔުޓީ ކޮމިޝަނަރ އޮފް ކަސްޓަމްސް އަބްދުﷲ ޝަރީފް އާއި ހޯރަފުށި ދާއިރާގެ މެމްބަރ އަހުމަދު ސަލީމް ވާހަކަފުޅު ދައްކަވާނެ އެވެ.
ގިނަ އަދަދެއްގެ ޔޮޓް ފަހަރު ކުރިން ބަނދަރު ކުރަމުން އައި ހއ. އުލިގަމަށް ޔޮޓް އައުން ސަރުކާރުގެ ގަވައިދުތަކާއި އުސޫލުތަކުގެ ސަބަބުން ވަރަށް ބޮޑަށް މަދުވެފައިވާ މައްސަލަ ހައްލުކުރުމުގެ ވައުދު ސަރުކާރުން ފުއްދުން ލަސްވާތީ ޔޮޓް ފަހަރުގެ އެޖެންޓުން މީގެކުރިން ވަނީ ކަންބޮޑުވުން ފާޅުކޮށްފަ އެވެ.
ރާއްޖެ ހުރަސްކޮށް ދަތުރުކުރާ ޔޮޓްފަހަރަށް އެންމެ ރަނގަޅު މަންޒިލެއްގެ ގޮތުގައި ބެލެވޭ އުލިގަމަށް ޔޮޓު އައުން އިތުރުވާނެ މަގު މިސަރުކާރުގައި ތަނަވަސްކޮށްދެއްވާނެ ކަމަށް ރިޔާސީ އިންތިޚާބުގެ ކެމްޕޭނުގައި ރައީސް އިބްރާހިމް މުހައްމަދު ސޯލިހް އުލިގަމުގައި ވައުދުވެ ވަޑައިގެންފައިވެ އެވެ.
ރައީސް އުލިގަމުގައި ވިދާޅުވީ ޔޮޓުތައް އައުން މަދުވީ އެ އުޅަނދުފަހަރުން ނަގާ ބޮޑެތި ފީތަކުގެ ސަބަބުން ކަމަށެވެ. އެކަން ހައްލުކޮށް އެ ރަށަކީ ޔޮޓު ފަހަރުގެ މަގުބޫލް މަންޒިލަކަށް ހައްދަވާނެ ކަމަށް ވިދާޅުވި އެވެ.
