ޤައުމުތަކުގައި ހަލުވިކަމާއި އެކު ކޮރޯނާ ވައިރަސް ފަތުރަމުންދާތީ ރައްކާތެރިވުމުގެ ގޮތުން ވެލާނާ އިންޓަނޭޝަނަލް އެއަރޕޯޓުގައި އަޅަންޖެހޭ ހުރިހާ ފިޔަވަޅެއް އަޅާފައިވާ ކަމަށް މޯލްޑިވްސް އެއަރޕޯޓް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
އެމްއޭސީއެލުން ބުނީ އެއަރޕޯޓަށް އެތެރެވާ ހުރިހާ މީހުންގެ ފިނިހޫނުމިން ސްކްރީން ކުރުމުގެ މަސައްކަތް ކުރިއަށް ގެންދާ ކަމަށާއި، ވެލާނާ އިންޓަނޭޝަނަލް އެއަރޕޯޓު އޮތީ ފުރިހަމައަށް ތައްޔާރީ ހާލަތުގައި ކަމަށެވެ. އަދި އެންމެންގެ ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވާ ކަމަށްވެސް އެމްއޭސީލުން ބުނެއެވެ.
މީގެ އިތުރުން އެމްއޭސީއެލުން ބުނީ ކަމާ ގުޅުންހުރި ހުރިހަ ފާރާތްތަކާއި ގުޅިގެން ސަލާމަތްތައް އަޅަންޖެހޭ ފިޔަވަޅުތައްވެސް އަޅަމުންދާ ކަމަށެވެ.
ރާއްޖެއިން ކޮރޯނާވައިރަސްގެ އަސަރު ފެނިދާނެތީ އެކަމަށް ތައްޔާރު ވެފައިވާކަމަށް ހެލްތު މިނިސްޓްރީން ވަނީ ބުނެފައެވެ.
ކޮރޯނާ ވައިރަސްގެ އަސަރު ފެންނަ މީހުން ކަަރަންޓީނުކޮށްގެން ފަރުވާދިނުމަށް ހުޅުމާލެ ޕްރީސްކޫލް އެކަމަށް ޚާއްޞަކޮށްފައިވާއިރު މިބަލި ފުޅާވެގެން ދާ ހާލަތެއްގައި މާލެ ކުރިމަތިން އޮންނަ ފުނަދޫގައި އެކަމުގެ އައިސޮލޭޝަން ފެސިލިޓީ ޤާއިމުކުރުމުގެ މަސައްކަތް ކުރުމަށް ސަރުކާރުން ވަނީ ނިންމާފައެވެ.
