ޞިއްޙީ އަދި ތަޢުލީމީ އިދާރާތަކުން 2019 ގެ ރިޕޯޓު ހުށަހަޅަމުން އަންނަ މިންވަރު ދަށްކަމަށް ފާހަގަކުރެވޭ ކަމަށް އިންފޮމޭޝަން ކޮމިޝަނަރ ހުސެއިން ފިޔާޒް މޫސާ ވިދާޅުވެއްޖެއެވެ.
ފިޔާޒް މިކަމާއި ގުޅޭގޮތުން ކުރެއްވި ޓުވީޓެއްގައި ވަނީ ޞިއްޙީ އަދި ތަޢުލީމީ އިދާރާތަކުން 2019 ވަނަ އަހަރުގެ ރިޕޯޓު ހުށަހަޅަމުން އަންނަ މިންވަރު ދަށް ކަމަށް ފާހަގަކުރެވޭ ކަމަށާއި، މިދިޔަ ފަސް އަހަރުވެސް ހެލްތު ސެންޓަރުތަކާއި ސްކޫލްތަކުގެ ރިޕޯޓު ލިބުނު މިންވަރު ނިޞްބަތުން ވަރަށް ދަށް ކަމަށެވެ.
ހޯމަ ދުވަހު އިންފޮމޭޝަން ކޮމިޝަނަރުގެ އޮފީހުން ސަރުކާރު ހިއްސާވާ ކުންފުނިތަކަށް 2019ގެ ރިޕޯޓު ހުށަހެޅުމަށް އަންގަން ފަށާފައެވެ. އިންފޮމޭޝަން ކޮމިޝަނަރ ވިދާޅުވެފައިވަނީ 2014 އިން 2018ގެ ރިޕޯޓު ހުށަހަޅާފައި ނުވާނަމަ އެ މަޢުލޫމާތު ވެސް ހުށަހަޅަން ޖެހޭ ކަމަށެވެ.
ފިޔާޒް ވިދާޅުވީ މަޢުލޫމާތު ހޯދާ ލިބިގަތުމުގެ ޤާނޫނުގެ ދަށުން އެސްއޯއީ ތަކަކީ ދައުލަތުގެ އިދާރާއެއް ކަމަށެވެ. ނަޒާހާތްތެރި ދައުލަތެއް އުފެދޭނީ ހާމަ ކަންބޮޑުވެގެން ކަމަށެވެ.
