އެމްޑީޕީން އިންތިޒާމުކޮށްގެން މާލެ ސިޓީގައި ކުރިއަށް ގެންދިޔަ މާލެ ސިޓީ ކައުންސިލް ވަރކްޝޮޕް ކާމިޔާބުކަމާއެކު ނިންމާލައިފިއެވެ.

ހޮނިހިރު ދުވަހު ހެނދުނު 9:30 އިން މެންދުރު ފަހު 3:30 އަށް ދަރުބާރުގޭގައި ކުރިއަށް ގެންދިޔަ ވަރކްޝޮޕްގައި މާލޭގެ ދާއިރާ ތަކުގެ ރައްޔިތުންގެ މަޖިލިސް މެންބަރުންނާއި، ކައުންސެލަރުންނާއި، ކެނޑިޑޭޓުންނާއި، ކެންޑިޑޭޓުންގެ ކެމްޕޭން ޓީމުތަކާއި، ޤައުމީ މަޖިލިސް މެންބަރުންނާއި، ޕާޓީގެ ލީޑަރޝިޕާއި، ،ޑަބްލިއު ޑީ ސީގެ މެންބަރުންވަނީ ބައިވެރިވެފައެވެ.

ރާއްޖެ އެމްވީއަށް މަޢުލޫމާތު ދެއްވަމުން ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ވިދާޅުވީ ގްރޫޕުތަކަށް ބަހާލައިގެން ކުރިއަށް ގެންދިޔަ މި ވަރކްޝޮޕްގައި މަޝްވަރާކޮށްފައިވަނީ މާލެ ސިޓީ ސާފުތާހިރު ކުރާނެ ގޮތާއި، މާލެ ސިޓީ ރައްކާތެރި ސިޓީއަކަށް ހެދުމާއި ، އިތުރަށް އާމްދަނީ އާއި ވަޒީފާ ހޯދާނެ ގޮތާއި ، ބޯހިޔާވަހިކަން ފޯރުކޮށްދޭނެ ގޮތްތަކާއި، މާލޭގެ މަގުތައް ތަަރައްޤީކުރާނެ ގޮތްގޮތާއި ، ޕާކުތައް ހަދާނެ ގޮތްތަކާއި ، ހުސްޖާގަ ހަދާނެ ގޮތްގޮތްތައް އަދި މުނިފޫހި ފިލުވުމަށް ކުރާނެ ކަންކަމާމެދުގައި ކަމަށެވެ.

މީގެއިތުރުން 2020 ވަނަ އަހަރުގެ ބަޖެޓު ބޭނުންކުރާނެ ގޮތާއި ކުރިއަށް ފަސް އަހަރަށް އިންތިޚާބުކުރާ މާލެ ސިޓީ ކައުންސިލުން މާލެއަށް ފޯރުކޮށްދޭނެ މަޝްރޫޢުތަކާއި ގުޅޭގޮތުން މަޝްވަރާ ކޮށްފައިވާ ކަމަށެވެ.

މި ކޮންފަރެންސްގައި މަޝްރޫޢުތައް ހިންގާނެ ލަނޑުދަނޑިތަކަށާއި ސުންގަޑިތަކާމެދުވެސް ވަނީ މަޝްވަރާ ކޮށްފައިވާ ކަމަށް އީވާ ވިދާޅުވިއެވެ.

މި މަޝްވަރާ ތަކަށްފަހު ހުށަހަޅާ ކަންކަން ދާނީ އެމްޑީޕީން ނެރޭ މެނިފެސްޓޯއަށް ކަމަށް އީވާ ވިދާޅުވިއެވެ.