300 އެއްހާ މީހުންނާއެކު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އިން ތިލަދުންމައްޗަށް ކުރާ ދަތުރު ފަށައިފިއެވެ.

ހއ. އަދި ހދ. ގެ ރަށްތަކަށް ކުރާ މި ދަތުރު ފަށާފައިވަނީ އާދިއްތަ ދުވަހުގެ ހަވީރު 4:30 ހދ. ކުޅުދުއްފުށީ "ސީކުއީން" ބޯޓުގައެވެ.

މި ދަތުރުގައި އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި އެމްޑީޕީގެ ލީޑަރޝިޕްގެ އިސް ބޭފުޅުންގެ އިތުރުން، ރައްޔިތުންގެ މަޖިލީހުގެ މެންބަރުންނާއި އެމްޑީޕީގެ ޢާންމު މެންބަރުން ބައިވެރިވަޑައިގެންނެވިއެވެ.

މި ދަތުރުގައި ހޯމަދުވަހު ދިއުމަށް ހަމަޖެހިފައިވަނީ ހއ. އިހަވަންދުއަށެވެ. އެއަށްފަހު ހޯރަފުށީ، ކެލާ، ބާރަށް އަދި ދިއްދުއަށެވެ. އެއަށްފަހު ހދ. ހަނިމާދޫ، ނޮޅިވަރަން، ކުމުންދޫ، ވައިކަރަދޫ އަދި ކުޅުދުއްފުށީ ސިޓީއަށް ދިއުމަށް ވަނީ ހަމަޖެހިފައެވެ.

މި ދަތުރުގެ ބޭނުމަކީ ތިލަދުންމަތީގެ ރަށްތަކަށް ޒިޔާރަތްކޮށް ރައްޔިތުންނާއި ބައްދަލުކުރުމެވެ.

މީގެ އިތުރުން ކުޅުދުއްފުށީ ސިޓީގައި ބާއްވާ އުތުރު މަހާސިންތާ ގައި ބައިވެރިވުމަށް ވެސް ވަނީ ހަމަޖެހިފައެވެ.