އަމިއްލަ މަޞްލަޙަތު އޮންނަ މައްސަލައަކާއި ގުޅޭގޮތުން މީސްމީޑިއާގައި ވަކީލަކާއި "ދިމާކޮށްލި" ކަމަށްބުނެ ބާރ ކައުންސިލްގެ މެންބަރު އަނާރާ ނަޢީމަށް ގިނަ ބައެއްގެ ފާޑުކިއުން ޢަމާޒުވެއްޖެއެވެ.

ނިމިދިޔަ 18 ވަނަ ރައްޔިތުންގެ މަޖިލީހުގެ މަކުނުދޫ ދާއިރާގެ މެންބަރުކަންވެސް ކުރައްވާފައިވާ އަނާރާއަށް ފާޑުކިއުން ޢަމާޒުވެފައި މިވަނީ ޤާނޫނީ ވަކީލު މަރިޔަމް ޝުނާނާ ގެ ޓްވީޓަކަށް އަނާރާ ދެއްވި ޖަވާބެއްގެ ސަބަބުންނެވެ.

އެގޮތުން 2020 ވަނަ އަހަރުގެ ޢަމާޒުތަކާއި ގުޅޭގޮތުން ޝުނާނާ ކުރެއްވި ޓްވީޓަކަށް ޖަވާބުދެއްވަމުން އަނާރާ ވިދާޅުވީ، ޢަމަލު ކުރެވޭ ގޮތަކުން ކުންފުންޏެއްގެ މަސައްކަތް ކުރާ މުވައްޒަފުންގެ ވަޒީފާ ގެއްލި ޢާއިލާތައް ބިކަވެދާނެ ކަަމާމެދުވެސް ވިސްނާލުން މުހިންމު ކަމަށެވެ.

އަނާރާ އެހެން ވިދާޅުވިއިރު، އަނާރާގެ މަޞްލަޙަތު އޮންނަ ކުންފުންޏެއް ކަމަށްވާ ޑަބްލިއު ކޮންސްޓްރަކްޝަން އިން ޢިމާރަތް ކުރަމުން ދިޔަ ތަނަކުން ވެއްޓުނު ސިމެންތި ބަސްތާއަކުން ޖެހި ބަންގްލަދޭޝްގެ އަންހެން ކުއްޖެއް ކަމަށްވާ ރައުޝަން ޖިއާން މަރުވި ކޭސްގަ ޝުނާނާ ވަނީ ޤާނޫނީ ގޮތުން މަސައްކަތް ކުރައްވާފައެވެ.

އެކަމާ ގުޅޭގޮތުން ޓްވިޓަރގައި އަނާރާއަށް ފާޑުކިއުން ޢަމާޒުވެފައިވާއިރު، އަނާރަ ވިދާޅުވީ، މުވައްޒަފުން ވަޒީފާއާ ޙަވާލުވަނީ ޒިންމާތަކަކާއެކު ކަމަށާއި، މުވައްޒަފުންގެ އިހުމާލުގެ ޒިންމާ ވެރިން އުފުލަން ނުޖެހޭ ކަމަށެވެ. އަދި ކޯޓުގެ ޙުކުމުގައިވެސް އެހެން ނިންމާފައިވާކަމަށް އަނާރާ ވިދާޅުވިއެވެ.

އެކަމާ ގުޅޭގޮތުން ޝުނާނާ ވިދާޅުވީ، އެ މައްސަލަ އިސްތިޢުނާފަށް ލާފައިވާ ކަމަށެވެ. އަދި އަނާރާ ނަޢީމްގެ ފިރިކަލުންގެ ކުންފުންޏަކާއި ދެކޮޅަށް ދަޢުވާކުރާ އެ މައްސަލައިގައި ޤާނޫނީ އެހީތެރިކަން ފޯރުކޮށްދޭތީ އެފަދައިން ދިމާނުކުރުމަށްވެސް ޝުނާނާ ވަނީ އެދިފައެވެ.

ބާރ ކައުންސިލްގެ މެންބަރެއްގެ ގޮތުގައި ހުންނަވައި އަމިއްލަ މަޞްލަޙަތު ހިމެނޭ މައްސަލައެއްގައި އެފަދައިން ވާހަކަ ދެއްކެވުމުން އެ މައްސަލަ ބަލައި ދިނުމަށް ގިނަ ބަޔަކު ދަނީ ބާރ ކައުންސިލަށް ގޮވާލަމުންނެވެ.

ޑިސެންބަރު މަހުގެ 17 ވަނަ ދުވަހު އިމާރާތަކުން ވެއްޓުނު ސިމެންތި ބަސްތާއަކުން ޖެހުމުގެ ސަބަބުން މަރުވި ރައުޝަން ޖިއާންގެ މަރުގެ މައްސަލައިގަ ދަޢުވާ ކުރި ހަ މީހުންގެ ތެރެއިން ޑަބްލިއު ކޮންސްޓްރަކްޝަންގެ މެނޭޖިންގ ޑިރެކްޓަރު ފިޔަވާ އެހެން އެންމެންގެ މައްޗަށް ދައުވާ ސާބިތުވެ، ވަނީ ޙުކުމް އިއްވާފައެވެ.