ފުރަތަމަ ބޮޑު ހަނގުރާމައިގެ މައްޗަށް ބިނާކޮށް ކުޅެފައިވާ ފިލްމެއް ކަމަށްވާ "1917" އަށް 77 ވަނަ ގޯލްޑަން ގްލޯބްސްގައި އެންމެ މޮޅު ޑްރާމާގެ އެވޯޑް ލިބިއްޖެއެވެ.

ހޯމަ ދުވަހު އެންމެ މޮޅު ޑްރާމާގެ އިނާމު "1917" އަށް ލިބުނުކަމުގައި ވީނަމަވެސް، މިފިލްމް ސިނާމަތަކުގައި އަޅުވާނީ ހުކުރު ދުވަހުއެވެ.

"1917"ގެ ޑައިރެކްޓަރ ސޭމް މެންޑެޒްއަށް ގޯލްޑަން ގްލޯބްސްގައި "ބެސްޓް ޑައިރެކްޓަރ" އެވޯޑް ލިބިފައިވާއިރު، މިއީ މެންޑެސްއަށް މި އެވޯޑް ލިބުނު ދެވަނަ ފަހަރެވެ. މެންޑެޒް މަޤްބޫލްވެފައިވަނީ 1999 ވަނަ އަހަރު ނެރުނު އެމެރިކަން ބިއުޓީންނެވެ.

އޭނާ ޑައިރެކްޓްކޮށްފައިވާ ފިލްމުތަކުގެ ތެރޭގައި ޖޭމްސް ބޮންޑްގެ ސްކައި ފޯލް އަދި ސްޕެކްޓަރ ވެސް ހިމެނެއެވެ.

ފިލްމް ރިވިއުކުރުމަށްފަހު "ދަ ގާޑިއަން" އިން ބުނެފައިވަނީ މި ފިލްމްގެ މަންޒަރުތަކުން ފެނިގެންދަނީ ފުރަތަމަ ބޮޑު ހަނގުރާމައިގައި އިނގިރޭސި ސިފައިންގެ ދެ ޒުވާނުން އިނިގިރޭސިވިލާތުގެ ދުޝްމަނުންކަމަށްވާ، ޖަރުމަނުންގެ އިމަށް ވަދެ އިނގިރޭސި ސިފައިންގެ ފައުޖަކަށް ވަރަށް މުހިއްމު މެސެޖެއް ދޭންކުރާ މަސައްކަތް ކަމަށެވެ.

މި ފިލްމުގެ އެކި ހިސާބުތަކުގައި ޑިޖިޓަލް އެޑިޓްސްތައް ހުރިކަމުގައިވިޔަސް، މި ފިލްމް ޝޫޓްކޮށްފައިވަނީ ދިގު (ލޯންގް) ޓޭކަކުންނެވެ.

މިފިލްމުގައި ލީޑްކުޅެފައިވަނީ ޑީން-ޗާރލްސް ޗެޕްމެންއާއި ޖޯޖު މެކްކޭއެވެ. މިދެތަރިންގެ އިތުރުން ޝާރލޮކްގެ ގޮތުގައި މަޝްހޫރުވެފައިވާ ބެނެޑިކްޓް ކަމްބާރބެޗް ވެސް ފެނިގެންދާނެއެވެ.