ކޯސްޓުގާޑުގަ ގެންގުޅޭ އުޅަނދުތަކުގެ މަޢުލޫމާތު ރައްޔިތުންނަށް އެނގެން ޖެހޭ ކަމަށާާއި، އެ މަޢުލޫމާތުތައް ހާމަކުރުމަކީ ޤައުމީ ސަލާމަތަށް އޮތް ނުރައްކަލެއް ކަމަށް ނުދެކޭ ކަމަށް ކޯސްޓްގާޑުން ބުނެފިއެވެ.

ކޯސްޓްގާޑުގައި މިހާރު ބޭނުންކުރާ ބައެއް އުޅަނދުތަކަކީ ހަލާކުވެފައިވާ އުޅަނދުތަކެއް ކަމަށް ޑިފެންސް މިނިސްޓަރު މާރިޔާ އަޙްމަދު ދީދީ ވަނީ ކޯސްޓްގާޑަށް 40 އަހަރު ފުރުމުގެ މުނާސަބަތުގައި ފޮނުއްވެވި ވީޑިއޯ މެސެޖެއްގައި ވިދާޅުވެފައެވެ.

މާރިޔާގެ ވާހަކަތަކާއި ގުޅުވައިގެން ކުރީގެ ޑިފެންސް މިނިސްޓަރު އާދަމް ޝަރީފް ވިދާޅުވެފައިވަނީ، ކޯސްޓްގާޑު އަދި ފުލުހުންގެ ވަޞީލަތްތައް ހަލާކުވެފައިވާކަން ޢާންމުކުރުމަކީ ރާއްޖޭގެ ޤައުމީ ސަލާމަތަށް ނުރައްކާވެދާނެ ކަމެއް ކަމަށެވެ.

އެކަމާއި ގުޅޭ ގޮތުން ރާއްޖެޓީވީގެ ފަލަ ސުރުޚީ ޕްރޮގުރާމުގަ ވާހަކަ ދައްކަވަމުން ކޯސްޓްގާޑުގެ ކޮމޮޑާންޓް ކާނަލް މުޙައްމަދު ސަލީމް ވިދާޅުވީ، ކޯސްޓްގާޑުގެ އުޅަނދެއް ހަލާކުވެފައިވާނަމަ އެކަން ކަމާއިބެހޭ ފަރާތްތަކަށް އެނގޭނެ ކަމަށެވެ. އަދި ރައްޔިތުންނަށް ޚިދުމަތްދޭ އުޅަނދުތަކެއް ނުހެދި އޮންނަ ކަމަށްވާނަމަ އެކަން ރައްޔިތުންނަށް އެނގޭނެ ކަމަށް ޤަބޫލުކުރައްވާ ކަމަށް ވިދާޅުވިއެވެ.

ސަލީމް ވިދާޅުވީ، ސީދާ ސްޕެސިފިކް މަޢުލޫމާތު ޙިއްސާ ނުކުރާނަމަ އެއީ މައްސަލައެއް ކަމަށް ދެކިވަޑައިނުގަންނަވާ ކަމަށެވެ.

ސަލީމް ވަނީ ހަލާކުވެފައިވާ އުޅަނދު ތަކުގެ ތަފުޞީލުތައް ހިއްސާކޮށްފައެވެ. އޭނާ ވިދާޅުވީ، ކަނޑުމަތީގެ އުޅަނދު ފަހަރުތައް މަރާމާތުކޮށް ބެލެހެއްޓުމަކީ ޚަރަދުތަކެއް ހިނގާ ކަމެއް ކަމަށާއި، އޮޕަރޭޝަން ތަކުގައި އުޅަނދުތައް ބޭނުންކުރާ ވަރަަކަށް އެ އުޅަނދުތައް ހަލާކުވަމުންދާ ކަމަށެވެ.

ގިނަ ދުވަސްތަކެއް ވަންދެން ހަލާކުވެފަ ހުރި ބައެއް އުޅަނދު ފަހަރުތައް މަރާމާތު ކުރެވިފައިނުވާކަން ފާހަގަކުރައްވަމުން ސަލީމް ވިދާޅުވީ، ބޮޑެތި އުޅަނދުތައް މަރާމާތު ކޮށްގެން ކަނޑަށް ނެރުމުގެ މަސައްކަތް ސަރުކާރުން އިސްކަމެއްދީގެން ކުރަމުން އަންނަ ކަމަށެވެ.