ރާއްޖޭގެ ކަނޑުގެ ސަރަހައްދުގައި ހިންގާ ޖަރީމާތައް ހުއްޓުވުމަށް އިންޓެލިޖެންސް ވަރުގަދަކުރަންޖެހޭ ކަމަށާއި، އެކަމަށް ސަރުކާރުން މަސައްކަތްތަކެއް ކުރަމުންދާ ކަމަށް ކޯސްޓްގާޑުން ބުނެފި އެވެ.

ކޯސްޓްގާޑަށް 40 އަހަރު ފުރުމާއި ގުޅިގެން ހޮނިހިރު ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ކޯސްޓްގާޑްގެ އެކޮމޮޑާންޓް މުހައްމަދު ސަލީމް ވިދާޅުވީ، ނިމިގެން ދިޔަ 2019 އަހަރު ދޭތެރެ ދޭތެރެއިން ގަވާއިދާ ހިލާފަށް ރާއްޖެއަށް ވަދެގެން އުޅޭ އުޅަނދުތައް އަތުލައިގަނެފައިވަނީ ބައިނަލްއަގްވާމީގޮތުން ގުޅިފައިވާ ފަރާތްތަކުގެ އެއްބާރުލުމާއި އެކު ކަމަށެވެ.

ސަލީމް ވިދާޅުވީ، ކަނޑުމަތީގައި ހިންގާ އެފަދަ އޮޕަރޭޝަންތަކުގައި އެންމެ މުހިއްމު އެއްޗަކީ އިންޓެލިޖެންސް ކަމަށެވެ. ދުނިޔޭގެ އިންޓެލިޖެންސް އެޖެންސީސްތަކުން ފޯރުކޮށްދޭ މައުލޫމާތުގެ އަލީގައި ފުލުހުންނާއި ގުޅިގެން ނިމިގެންދިޔަ 2019 ވަނަ އަހަރު ގިނަ އަދަދެއްގެ ޑްރަގް އެތެރެކުރަން އުޅުނު ބޯޓް ފަހަރުތައް ހިފެހެއްޓިފައިވާކަން އޭނާ ފާހަގަކުރެއްވިއެވެ.

ކޯސްޓްގާޑުން ބުނީ، ކުރިން ރާއްޖޭގެ ކަނޑުގެ ސަރަހައްދަށް ގިނައިން ވަދެ އުޅެނީ މަސްވެރިކަންކުރާ ބޯޓު ފަހަރުތައް ކަަމަށާއި، މި ފަހަކަށް އައިސް އިންޑިއާ ކަނޑުގައި ހިންގާ ޖަރިމާތައް ގިނަވެފައިވާ ކަމަށެވެ.

ސަލީމް ވިދާޅުވީ، އެޖަރީމާތައް ހުއްޓުވުމަށް ރަނގަޅު އޮޕަރޭޝަންސްތައް ކާމިޔާބުކަމާއި އެކު ހިންގޭނީ އިންޓެލިޖެންސް ނެޓްވޯކްތަކާއި ގުޅިގެން އާއި ކޯސްޓްގާޑުގެ އިންޓެލިޖެންސްވެސް ވަރުގަދަ ކުރެވިގެން ކަމަށެވެ. އޭނާ ވިދާޅުވީ، އެކަންތައްތައް ސަރުކާރަށް ފާހަގަކުރެވިގެން އިންޓެލިޖެންސް ވަރުގަދަ ކުރުމުގެ މަސައްކަތްތައް މިހާރު ކުރަމުންދާ ކަމަށެވެ.

ކޯސްޓްގާޑްގެ އިންޓެލިޖެންސް ވަރުގަދަ ކުރަން ޖެހޭ ކަމަށް ބުނެފައިވާއިރު، ކޯސްޓްގާޑްގެ އުޅަނދުތައް މަރާމާތު ކުރަން ހަމަޖެހިިފައިވާ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވަނީ ވިދާޅުވެފައެވެ.