ސަލާމަތީ ޚިދުމަތްތަކުގެ ވަޞީލަތްތައް ހަލާކުވެފައިވާކަން ހާމަކުރުމަކީ ނުރައްކާތެރިކަމެއް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަދި ކުރީގެ ޑިފެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

ކުރީގެ ރައީސް ޢަބްދުﷲ ޔާމީނުގެ ވެރިކަމުގައި ޑިފެންސް މިނިސްޓަރުކަން ކުރެއްވި އާދަމް ޝަރީފް ކުރެއްވި ޓްވީޓެއްގައި ވިދާޅުވެފައި ވަނީ، އެމްއެންޑީއެފް، ކޯސްޓްގާޑު އަދި ފުލުހުންގެ ވަޞީލަތްތައް ހަލާކުވެފައިވާކަން ޢާންމުކުރުމަކީ ރާއްޖޭގެ ޤައުމީ ސަލާމަތަށް ނުރައްކާވެދާނެ ކަމެއް ކަމަށެވެ. އަދި ވަގުތާއި ޙާލަތުގެ ނާޖާއިޒު ފައިދާ ބަޔަކު ނަގާފާނެ ކަމެއް ކަމަށެވެ،

ޝަރީފް ވިދާޅުވީ ކޮންމެ ސަރުކާރަކުންވެސް އެ ތަންތަނުގެ ވަޞީލަތްތައް މަރާމާތު ކުރާނެ ކަމަށެވެ.

ޝަރީފް މިހެން ވިދާޅުވީ، ޑިފެންސް މިނިސްޓަރު ކަމާއި ޙަވާލުވެވަޑައިގެންނެވި އިރު ކޯސްޓްގާޑުގެ ގިނަ އުޅަނދުތައް ހުރީ ހަލާކުވެފައި ކަމަށާއި، މި ފެށުނު 2020 ވަނަ އަހަރުގައި އުޅަނދުތައް މަރާމަތު ކުރުމަށް ގިނަ މަސައްކަތްތަކެއް ކުރަން ހަމަޖެހިފައިވާ ކަމަށް ޑިފެންސް މިނިސްޓަރު މާރިޔާ އަޙްމަދު ދީދީ ވިދާޅުވުމާއި ގުޅިގެންނެވެ. ޑިފެންސް މިނިސްޓަރު އެހެން ވިދާޅުވީ، ކޯސްޓްގާޑް ޚިދުމަތަށް 40 އަހަރު ފުރުމުގެ މުނާސަބަތުގައި ދެއްވި އިންޓަވިއުއެއްގައެވެ.