އިންފުލުއެންޒާ ފެތުރުމުގެ ކުރިން ވެކްސިން ޖެހުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އެޗްޕީއޭގެ އެޕިޑަމޮއޮލޮޖިސްޓް ޑރ.އިބްރާހިމް އަފްޒަލް ވިދާޅުވީ އިންފުލުއެންޒާ ޑެންގީއާ ވަރަށް ތަފާތު ކަމަށާއި، އޭގޮތުން އިންފުލުއެންޒާ އިން ސަމާލުވުމަށް ވަކި ގޮތްތަކަށް އަމަލުކުރަންޖެހޭ ކަމަށެވެ.
ޑރ. އަފްޒަލް ވިދާޅުވީ ގައިންގަޔަށް އަރާ ބަލިތަކާއި އާންމު ގޮތެއްގައި ފެތުރެމުންދާ ބަލިތަކުގެ ތެރެއިން އެންމެ ނުރައްކާތެރިކަން ބޮޑު އިންފުލުއެންޒާއަށް އާންމުން ހޭލުންތެރިކުރުވުމުގެ ގިނަ މަސައްކަތްތައް ކުރާ ކަމަށެވެ.
ނަމަވެސް އެންމެ އެދެވޭ ގޮތަކަށް ރައްޔިތުންގެ ފަރާތުން ބަލިން ރައްކާތެރިވުމަށް މަސައްކަތް ކުރާތަން ނުފެންނަ ކަމަށް ޑރ.އަފްޒަލް ވިދާޅުވިއެވެ.
ޑރ.އަފްޒަލް ވިދާޅުވީ އިންފުލުއެންޒާ ބަލި ފެތުރޭ ކަމަށް މައުލޫމާތު ލިބޭ ހިސާބުން ގިނަ ބަޔަކު ވެކްސިން ޖަހާ ކަމަށާއި، ނަމަވެސް އިންފުލުއެންޒާ އުޅެނިކޮށް ވެކްސިން ޖެހުމަކީ އެންމެ ރަނގަޅު ގޮތް ނޫން ކަމަށެވެ. ރަނގަޅު ގޮތަކީ ބަލީގެ ވާހަކަ ނުދައްކާ ދުވަސްވަރުގައި އިންފުލުއެންޒާއަށް ވެކްސިން ޖެހުން ކަމަށް ޑރ.އަފްޒަލް ވިދާޅުވިއެވެ. އަދި ވެކްސިންގެ އަސަރު ހަށިގަނޑަށް ކުރުމަށް ދެ ހަފްތާވަރު ނަގާނެ ޑރ. އަފްޒަލް ފާހަގަކުރެއްވިއެވެ.
އިންފްލެންޒާ އެހެން ބަލިތަކާ ތަފާތުވާނެ. އެއީ ޑެންގީއާ ތަފާތުވާ ތަންކޮޅެއް އިންނާނެ. އިންފުލުއެންޒާއަށް އިންނާނެ ވަކިން ޚާއްސަ ވަކި ބޭހެއް ވެސްދޭން. އިންފުލުއެންޒާގައި އަޅުގަނޑުމެންގެ އެއްކަމަކީ ބޭސް ހުރިހާ ހިސާބެއްގައި ހުރިތޯ ބެލުން ދެން އަޅުގަނޑުމެން ތަފާސް ހިސާބުތަކަށް ބަލާއިރު ކުރިއަށް އޮތްތާގައި ފެންނަންޏާ އެހެން އަހަރުތަކުގެ ޕެޓާންސްތަކަށް ބަލާފަ އިތުރުވާ ކަމަށް ފެންނަންޏާ އަޅުގަނޑުމެން އެބޭސްތައް ދުރާލާ އޯޑަރު ވެސް ދެން އިތުރު ބޭސްތައް އިތުރުކުރަން.ޑރ.އަފްޒަލް- އެޗްޕީއޭގެ އެޕިޑިމިއޮލޮޖިސްޓް
ޑރ.އަފްޒަލް ވިދާޅުވީ އިންފުލުއެންޒާ ވެކްސިން ރާއްޖޭގެ ހުރިހާ ރައްޔިތުންނަށް ފޯރުކޮށްދިނުމަށް މަސައްކަތް ކުރާ ކަމަށެވެ. އަދި ހުރިހާ ހިސާބަކުން ވެކްސިން ލިބެން ހުރިތޯ ގަވާއިދުން މޮނީޓަރކޮށް ރަނގަޅަށް ބަލަހައްޓަމުންދާ ކަމަށެވެ.
