މިހާރު ރާއްޖޭގައި ފެތުރެމުންދާ ރޯގާ އާއި ގުޅިގެން ހޮނިހިރު ދުވަހުގެ ނިޔަލަށް އިތުރު ނުވަ މީހަކަށް އިންފްލުއެންޒާ އެޗްވަންއެންވަން ޖެހިފައިވާ އިރު މި ރޯގާ ގައި އެގާރަ މީހަކު އެޑްމިޓްކޮށްފައިވާ ކަމަށް ހެލްތް ޕްރޮޓެކްޝަން އޭޖެންސީން ހާމަކޮށްފި އެވެ.

އެޗްޕީއޭ އިން އާއްމުކޮށްފައިވާ ތަފާސް ހިސާބުތަކުން ދައްކާ ގޮތުގައި މިހާތަނަށް 375 މީހަކު ރޯގާއަށް ޓެސްޓް ކުރެވިފައިވާއިރު އެޗްވަންއެންވަން އަށް ޖުމްލަ 123 މީހުން ވަނީ ޕޮސިޓިވް ވެފަ އެވެ. ރާއްޖޭގެ އެކި ސަރަހައްދުތަކުން މި ރޯގާ ފެތުރެމުންދާ އިރު  ހޮނިހިރު ދުވަހު ވަނީ މާލެއިން އެކަނި 728 މީހުން ފްލޫ ކްލިނިކަށް ދައްކާފަ އެވެ. މީގެ ތެރޭގައި އައިޖީއެމްއެޗުގެ ފްލޫ ކްލިނިކަށް 375 މީހުން، އޭޑީކޭ އިން 250 މީހުން ވަނީ ޑޮކްޓަރަށް ދައްކާފަ އެވެ. އަރިދަފުސް ރޯގާ އާއި އެހެން ވައިރަލް ހުން ޖެހިގެން، އަތޮޅުތަކުގެ ފްލޫ ކްލިނިކަށް 1179 މީހުން ވަނީ ޑޮކްޓަރަށް ދައްކާފައިވެ އެވެ. 

މިހާތަނަށް ފްލޫ ކްލިނިކްތަކަށް އެންމެ ގިނައިން ދައްކާފައިވަނީ، ބުރާސްފަތި ދުވަހު އެވެ. އެދުވަހު އަތޮޅުތަކުގެ ފްލޫ ކްލިނިކުން 1551 މީހުން ޑޮކްޓަރަށް ދައްކާފަ އެވެ. 

ހޮނިހިރު ދުވަހު އަތޮޅުތަކުން އެންމެ ގިނައިން ޑޮކްޓަރަށް ދައްކާފައިވަނީ، ރ އަތޮޅާއި ހދ އަތޮޅެ އެވެ. އެގޮތުން ލ އަތޮޅުގެ ފްލޫ ކްލިނިކަށް 126 މިހުން ޑޮކްޓަރަށް ދައްކާފައިވާ އިރު ތ އަތޮޅުގައި ޑޮކްޓަރަށް ދައްކާފައިވަނީ 111 މީހުންނެވެ. މީގެ އިތުރުން ނ އަތޮޅުގެ ފްލޫ ކްލިނިކް ތަކަށް 104 މީހުން ޑޮކްޓަރަށް ދައްކާފައިވާ އިރު ލ އަތޮޅުގެ ފްލޫ ކްލިނިކް ތަކަށް 103 މީހުން ވަނީ ޑޮކްޓަރަށް ދައްކާފަ އެވެ.

މިހާރު ފެތުރެމުންދާ ރޯގާތަކާ ގުޅޭ ގޮތުން ޑޮކްޓަރުން ވިދާޅުވަނީ މި ބައްޔަށް ރައްކާތެރިވުމުގެ ގޮތުން އަމިއްލަ ސާފުތާހިރު ކަމަށް ސަމާލުވާން ޖެހޭ ކަމަށާއި ބަލިން ރައްކާތެރިވުމުގެ ގޮތުން ބަލީގެ އަލާމާތްތައް ފެންނަ ކަމުގައިވާ ނަމަ މީހުންގެ ތެރެއަށް ނުކުންނަ އިރު މާސްކް އެޅުމަށް ވެސް އިލްތިމާސްކޮށްފަ އެވެ.

އެޗްޕީއޭ އިން ވަނީ މި ބައްޔަކީ ވެސް އާއްމުކޮށް މިއުޅޭ ފަދަ ފްލޫއަކަށް ވުމާ އެކު އެބައްޔަށް ފަރުވާ ހޯދުމުގައި ބޮޑުވަރު ނުވާ މީހުން ކޮންމެހެން ފްލޫ ކްލިނިކްތަކަށް ނުދިއުމަށް އެދިފަ އެވެ. އެގޮތުން ހާލު ދެރަނުވާ ހާލަތުގައި ފްލޫ ކްލިނަކަށް ދިއުމުން، ބަލި ޖެހިފައިވާ މީހުންގެ ފަރާތުން އިންފްލުއެންޒާ ޖެހުމަށް އޮތް ފުރުސަތު ބޮޑުވާ ކަމަށް އެޗްޕީއޭ އިން ބުނެއެވެ.

އެޗްޕީއޭ އިން ވަނީ އިންފްލުއެންޒާ އެޗްވަންއެންވަން ޖެހިފައިވާ މީހުންގެ ތެރެއިން ގިނަ މީހުން ރަގަޅުވެފައިވާކަން ފާހަގަކޮށްފަ އެވެ.

ރާއްޖޭގައި ފެތުރެމުންދާ ރޯގާ އާއި ގުޅިގެން ގިނަ އަދަދެއްގެ ބަޔަކަށް މި ބަލިޖެހެމުންދާ އިރު ބަލިން ރައްކާތެރި ވުމަށްޓަކައި މީހުން ގިނައިން އުޅޭ ސަރަހައްދުތަކަށް ނުދިއުމަށާއި، ހުން އައިސް ރޯގާ ޖެހިއްޖެ ނަމަ ގިނަގިނަ އިން ދިޔާ އެއްޗެހި ބުއި މަށާއި، ހުން ގަދަވާނަމަ ހަށިގަނޑުގައި ފެން ހޭކުމަށް ޑޮކްޓަރުން ލަފާ ދެއްވައެވެ.

ރާއްޖޭގައި މިހާރު ފެތުރެމުންދާ ރޯގާ އާއި ގުޅިގެން ދެ މީހުން ވަނީ މަރުވެފަ އެވެ.