މޯލްޑިވްސް ބިޒްނަސް އެވޯޑްސް (އެމްބީއައި) މި މަހުގެ 21 ވަނަ ދުވަހު ކްރޮސްރޯޑްސް މޯލްޑިވްސްގައި ބާއްވަން ނިންމައިފިއެވެ.

މި އިވެންޓް އިންތިޒާމު ކުރާ ބްލޭޒަން އިންކުން ބުނީ މިފަހަރުގެ އެވޯޑް ހަފުލާގައި 200 މީހުން ބައިވެރިވާނެ ކަމަށާއި މި އަހަރު ވެސް 29 ކެޓަގަރީއަކުން އެވޯޑު ދޭނެ ކަމަށެވެ.

އެމްބީއޭ އެވޯޑަށް ނޮމިނޭޝަނަށް ހުޅުވާލުމާއެކު 50 އަށްވުރެ ގިނަ ފަރާތުން ކުރިމަތިލާފައިވާއިރު މީގެތެރޭގައި ވިޔަފާރީގެ އެކި ދާއިރާތަކާއި ސިނާޢަތްތަކުގައި މަސައްކަތް ކުރާ މީހުން ހިމެނެއެވެ. މޯލްޑިވްސް ބިޒްނަސް އެވޯޑްސްގެ ޖަޖު ކުރުން މިހާރު ވަނީ ނިންމާލާފައެވެ.

މޯލްޑިވްސް ބިޒްނަސް އެވޯޑަކީ ރާއްޖޭގެ އިޤްތިޞާދުގައި ހިމެނޭ އެކި އިންޑަސްޓްރީތަކުން ފާހަގަކޮށްލެވޭ ވިޔަފާރިތަކަށް ދޭ އެވޯޑެކެވެ. މި އެވޯޑުގެ ބޭނުމަކީ އެ ވިޔަފާރިތަކުގެ ސަބަބުން އިޤްތިޞާދަށް އަންނަ ހެޔޮ ބަދަލުތަކާއި ރާއްޖޭގެ ވިޔަފާރީގެ ދާއިރާ ތަރައްޤީ ކުރުމަށް ކުރަމުންދާ މަސައްކަތް ފާހަގަކޮށް، އެހެން ވިޔަފާރިތައް ތަރައްޤީ ވުމަށް ހިތްވަރުދިނުމެވެ.

އެސްޓީއޯ އިން ވަނީ މި އަހަރު ވެސް އެވޯޑްގެ ޓައިޓްލް ސްޕޮންސަރަކަށްވެފައެވެ. މިއީ އެސްޓީއޯ އިން މި އެވޯޑުގެ ޓައިޓްލް ސްޕޮންސަރަކަށްވާ ދެވަނަ އަހަރެވެ. މިދިޔަ އަހަރު ބޭއްވި މޯލްޑިވްސް ބިޒްނަސް އެވޯޑު 2018ގެ އެންމެ ކާމިޔާބު ކުންފުންޏަކީ އެސްޓީއޯގެ ސަބްސިޑިއަރީ ކުންފުނި އެލައިޑް އިންޝުއަރަންސެވެ.

މޯލްޑިވްސް ބިޒްނަސް އެވޯޑްސް ބާއްވަން ފެށީ މިދިޔަ އަހަރެވެ. ފުރަތަމަ އެވޯޑްސް ޙަފުލާގެ ތެރެއިން ތަފާތު 23 ދާއިރާއަކުން އެކި ފަރާތްތަކަށް އެވޯޑު ދިނެވެ.