ފެތުރެމުންދާ އެޗްވަންއެންވަން ރޯގާއިން ދިފާއުވުމުގެ ވެކްސިންތަކެއް ހިފައިގެން މަޖިލިސް މެންބަރުންތަކެއް ތިބި ފޮޓޯތަކެއް ދައުރުވަމުންދަނިކޮށް، ވެކްސިން އެތެރެކޮށްގެން ގެންގުޅޭ ފަރާތްތަކަށް މެޑިކަލް ކައުންސިލްގެ ރައީސް ޑރ. އަބްދުﷲ އަފީފް ނަސޭހަތްތެރިވެއްޖެ އެވެ.
ދައުރުވަމުންދާ ފޮޓޯތަކުން ފެންނަނީ ރައްޔިތުންގެ މަޖިލީހުގެ ބިލެއްދޫ ދާއިރާގެ މެންބަރު އަހުމަދު މުބީންއާއި ވެލިދޫ ދާއިރާގެ މެންބަރު ޔާމީން ރަޝީދުގެ އިތުރުން ދުވާފަރު ދައިރާގެ މެންބަރު މުހައްމަދު އަލީ ވެކްސިންތައް އަތްޕުޅަށް ނަންގަވައިގެން ތިއްބަވަނިކޮށެވެ.
އެ ފޮޓޯތައް މުބީން ޓްވީޓެއް ކުރެއްވި އިރު، އެ ޓްވީޓުގައި ވިދާޅުވެފައިވަނީ "ވެކްސިންތައް ވެސް ގެނެސްފި، މެޑަމް ވަރެއް ހަމަ ނެތް" ކަމަށެވެ. އަދި މެޑަމް ދެއްވާ ދީލަތި އެހީ އަށް މުބީން ޝުކުރު އަދާކޮށްފައިވެސްވެ އެވެ.
Vaccine ves genessi, Medam vareh hamanei. Nuhuttuveyne, raaslaafa kuriyah. Shukuriyya Medam thiyadhevva dheelathi eheeah. #FluCrisis #RY2018 pic.twitter.com/6H1TT4apDj
— Ahmed Mubeen #RY2018 (@ahmedmubean) March 17, 2017
އެ ފޮޓޯތައް ދައުރުވަމުންދަނިކޮށް، ޑރ. އަފީފް ފޭސްބުކްގައި ވިދާޅުވެފައިވަނީ ފްލޫ ރޯގާ ކޮންޓްރޯލް ކުރުމުގެ ގޮތުން ބައެއް ބޭފުޅުން އަމިއްލަފުޅަށް ރާއްޖެއިން ބޭރުން ވެކްސިން ގެންނާތީ ދެ ނުކުތާއެއް ފާހަގަކޮށްލާ ކަމަށެވެ.
އެގޮތުން ފުރަތަމަ ނުކުތާއެއްގެ ގޮތުގައި ޑރ. އަފީފް ވިދާޅުވީ އިންފްލުއެންޒާ ވެކްސިންއަކީ ވެކްސިން ޕްރޮޑަކްޝަން އިން ފެށިގެން ވެކްސިން ދީ ނިމެންދެން 2-8 ޑިގްރީ ސެލްސިއަސް ގައި ބަހައްޓަން ޖެހޭ އެއްޗެއް ކަމަށެވެ.
ޑރ. އަފީފް ވިދާޅުވީ އެ ނޫން ފިނިހޫނުމިނެއްގައި ވެކްސިން ގެންގުޅެފިނަމަ، ވެކްސިން ހަލާކުވާނެ ކަމަށާއި ހަލާކުވެފަިއވާ ވެކްސިން ދިނުމުން ފައިދާކުރުމުގެ ބަދަލުގައި ލިބިދާނެ ގެއްލުން މާބޮޑު ކަމަށެވެ.
ދެވަނަ ނުކުތާއެއްގެ ގޮތުގައި ޑރ. އަފީފް ވިދާޅުވީ ވެކްސިންއަކީ އާންމު ގޮތެއްގައި ވަރަށް ރައްކާތެރި އެއްޗެއް ކަމަށާއި ވެކްސިން ދިނުމުން އެލާޖިކް ރިއެކްޝަނެއް އައުމަކީ ނާދިރުކަމަކަށް ވީނަމަވެސް ރިއެކްޝަނެއް އަތުވެދާނެ ކަމަށް ބެލުމަކީ މުހިންމު ކަމެއް ކަމަށެވެ.
އޭނާ ވިދާޅުވީ އަމިއްލަ އަށް ގެންނަ އެއްވެސް ވެކްސިންއެއް، ވެކްސިން ދީގެން އަތުވެދާނެ ސީރިއަސް ރިއެކްޝަނެއް މެނޭޖް ނުކުރެވޭފަދަ ތަނެއްގައި ނުދިނުމަކީ ބުއްދިވެރިކަމެއް ކަމަށެވެ.
އެޗްވަންއެންވަން ރޯގާއާ ގުޅިގެން ހެލްތް ޕްރޮޓެކްޝަން އެޖެންސީ(އެޗްޕީއޭ) އިން އުފައްދާފައިވާ ކޮމެޓީގައި ހިމެނިވަޑައިގަންނަވާ އޭޑީކޭގެ ޑޮކްޓަރު އަބްދުﷲ ނިޔާފް ވަނީ ޑރ. އަފީފްގެ ވާހަކަ ފުޅަށް ތާއީދު ކުރައްވާފަ އެވެ.
Raajjeyge emme senior kudakudhinge doctor, Dr Afeef ge muhimmu baskolheh. #ColdChain #safetyfirst pic.twitter.com/mzh3PUR1i2
— Abdulla Niyaf (@niyaf) March 18, 2017
ނިޔާފް ވިދާޅުވީ އެ ވާހަކައަކީ ރާއްޖޭގެ އެންމެ ސީނިއާ ކުޑަކުދިންގެ ޑޮކްޓަރު، ޑރ. އަފީފްގެ މުހިންމު ބަސްފުޅެއް ކަމަށެވެ.
