ފަނޑިޔާރުންނަށް ބިރު ދައްކާ، އަދި ނުފޫޒު ނުފޯރުވުމަށް ދިވެހިރާއްޖޭގެ ފަނޑިޔާރުންގެ ޖަމްއިއްޔާއިން ގޮވާލައިފި އެވެ.
ފަނޑިޔާރުންގެ ޖަމްއިއްޔާއިން ކުރި ޓްވީޓެއްގައި ބުނެފައިވަނީ، ފަނޑިޔާރުންނަށް ބިރު ދައްކައި، ނުހެދުމަށާއި ހަމަޖެހިފައިވާ ގާނޫނީ އިމުން ބޭރުން ފަނޑިޔާރުންގެ މަސައްކަތާބެހި، ނުފޫޒު ފޯރުވައި ނުހެދުމަށް އިލްތިމާސް ކުރާ ކަމަށެވެ.
ފަނޑިޔާރުންގެ ޖަމިއްޔާއިން މިގޮތަށް ގޮވާލާފައިވާއިރު، ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން ކޮށްފައިވާ މަނީ ލޯންޑަރިންގ ދައުވާ ސާބިތު ވުމާއި ގުޅިގެން އެމަނިކުފާނުގެ މައްޗަށް ވަނީ ކުށް ސާބިތުވެ ފަސް އަހަރަށް ޖަލަށްލުމަށް ކްރިމިނަލް ކޯޓުން ހުކުމް ކޮށްފަ އެވެ.
ރައީސް ޔާމީންގެ މައްޗަށް އެ ޝަރީއަތް ހިންގަމުން ދަނިކޮށް، ފަނިޔާރުންނަށް އިންޒާރުދެމުންދާކަން ވަނީ ފާހަގަ ކުރެވިފަ އެވެ.
ފަނޑިޔާރުންނަށް އިންޒާރު ދެމުންދާކަން ފުލުހުންނާއި ޑިޕާޓްމަންޓް އޮފް ޖުޑީޝާލް އެޑްމިނިސްޓްރޭޝަން (ޑީޖޭއޭ) އިން ވެސް ވަނީ ހާމަކޮށްފަ އެވެ.
ރައީސް ޔާމީން ޖަލަށް ލުމަށް ކުރި ހުކުމާއި ގުޅިގެން، އެމަނިކުފާނުގެ ޕީޕީއެމާއެކު ކޯލިޝަން ހަދާފައިވާ ޕީއެންސީގެ ރައީސް އަބްދުއްރަހީމް، ފަނޑިޔާރުންނަށް ނިސްބަތްކުރައްވައި، ހުތުރު ބަހެއް ބޭނުންކޮށް، އިންޒާރު ދިން މައްސަލައެއް ވަނީ ފުލުހުންނަށް ވަނީ ހުށަހަޅާފަ އެވެ.
ފަނޑިޔާރުންގެ އިތުރުން، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާއި މަޖިލީހުގެ ބައެއް މެމްބަރުންނަށް ވެސް އިންޒާރުތައް ދެމުންދާ ކަމަށް ވެއެވެ. އޭގެ ތެެރެއިން ބައެއް މައްސަލަތައް ފުލުހުންނަށް ހުށަހެޅި ފުލުހުން ދަނީ ތަހުގީގު ކުރަމުން ނެވެ.
