ސަރުކާރަށް އަހަރެއް ފުރުނުއިރު، އެންމެ ހިތްހަމަޖެހިވަޑައިގެންނެވީ ގައުމު އަމާންކަމާއި ސުލްހަވެރިކަން ޤާއިމްކުރެވުމުންކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އެމްޑީޕީގެ އެތެރޭގެ އިންތިހާބުގައި ވޯޓު ލެއްވުމަށްފަހު ރާއްޖެޓީވީއަށް ދެއްވި އެކްސްކްލޫސިވް އިންޓަވިއުއެއްގައި ރައީސް ވިދާޅުވީ، ވެރިކަމާއި ހަވާލުވެވަޑައިގެންނެވިއިރު ކުރީ ސަރުކާރުން އޮޅުންބޮޅުންވާއަރާގޮތަށް ކަންތައްތައް ކޮށްފައި ހުރި ކަމަށެެވެ. އެގޮތުން ބައެއް ޕްރޮޖެކްޓްތަކާއި ބައެއް މަސައްކަތްތައް ކުރީ ސަރުކާރުން ކޮށްފައިހުރީ އެންމެ އެކަށީގެންވާ ގޮތަށް ނޫން ކަމަށް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ، ސަރުކާރަށް އަހަރެއްވީއިރު އެކަންތަކަށް ވަރަށް ބޮޑު ހައްލެއް އައިސްފިކަަމަށް ގަބޫލުފުޅުކުރައްވާ ކަމަށެވެ. ރައީސް ވިދާޅުވި ގޮތުގައި އެމަނިކުފާނުގެ ސަރުކާރަށް އަހަރެއް ފުރުނުއިރު އެންމެ އުފާފުޅުވެވަޑައިގަންނަވަނީ ރައްޔިތުންނަށް ބިރެއްނެތި އުޅެވޭނެ ގޮތް ހަމަޖައްސައިދެވުމުންނެވެ.

ގައުމު އަމަންކަމާއި ސުލްހަވެރިކަމާއިއެކު ހިންގުމުން އުފާފުޅުވާ ކަމަށްވާ ރައީސް ވިދާޅުވެފައިވާއިރު، ޖުމްހޫރީ ދުވަހުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، ވޭތުވެދިޔަ އަހަރުގެ ޕޮލިސް ރިކޯޑްތަކަށް ބަލާއިރު، އަނިޔާވެރި ކުށްތައް، އެންމެ މަދުން ހިނގީ މި އަހަރުކަން އިނގޭ ކަމަށެވެ.

ގުރޫޕް މާރާމާރީގެ ޢަދަދުވެސް މިދިޔަ އަހަރަށްވުރެ 50 އިންސައްތަ މަދުވެއްޖެ ކަމަށް ރައީސް ވިދާޅުވިއެވެ. މިދިޔަ ހަ އަހަރުގެ ތެރޭގައި ގޭންގް ކުށްތަކުގައި، މާލޭގެ މަގުތަކުގައި 21 މީހަކު މަރާލާފައިވާ ކަމަށް ރައީސް ހާމަކުރެއްވިއެވެ.